Mawkyrwat, ‘Nailar 01: Ka South West Khasi Hills District Badminton Association (SWKDBA) ka la ïoh pynlong ka jingïalang hapoh ka Indoor Hall Mawkyrwat kum ka dak ban ai mynsiem ïa ki 13 ngut ki ‘rang bad ki ‘thei ïalehkai badminton kiba napoh ka South West Khasi Hills District ki ban sa leit ïa shimbynta ha ka 28th State Championships ka ban long ha Nongstoiñ.
Ïa ka jingïalang kitbok kitrwiang ha kane ka sngi la pynlong ha ryngkat ka jingïadonlang u bah H.S. Diengdoh kum u President jong ka South West Khasi Hills District Badminton Association (SWKDBA) ha kaba na ka liang jong u u la ai ruh ki kyntien jingkhublei bad kyrkhu kyrdoh ïa ki 13 ngut ki ban sa leit ïa shimbynta ha ka 28th State Championships ka ban long ha Nongstoiñ naduh 02 tarik haduh ka 05 u bnai ‘Nailur, 2023.
Ki 13 ngut ki ban sa leit ban ïashimbynta ki long kiba hapoh ka 13 snem (shynrang) u Mandapkupar Wanniang, hapoh 15 snem (shynrang marwei) dei u Adrian Mars Syiemlieh, hapoh 15 snem (kynthei marwei) ka Wansaphi Marpna, hapoh 17 snem (shynrang marwei) u Givenwarder Lyngdoh, hapoh 17 snem (kynthei marwei) ka Deidaphi Marpna, hapoh 15 snem (Boys Double) dei u Mewalambok Marweiñ bad u Adrian Mars Syimelieh, hapoh 17 snem (Girls Double) ka Wansaphi Marpna bad ka Deidaphi Marpna, hapoh 19 snem (shynrang marwei) u Alwin Richal Iawphniaw, hapoh 19 snem (Boys Double) u Givenwarder Lyngdoh bad u Alwin Richal Iawphniaw.
Nangta, ha ka Open Men Double u Evendonal Iawphniaw bad u Pynkhlaiñkupar Wanniang katba ha ka Mixed Doubles u Pynkhlaiñkupar Wanniang bad ka Judi Wanniang bad u Synsharlang Lyngdoh ha ka jingïalehkai Single Open.
