Shillong, Kyllalyngkot 06 : Ka Hynñiewtrep National Youth Front (HNYF) Riwar Mihngi Circle ka ai ïa ka kitbok ehdaw ïa ka Nongmadan FC ka kynhun lehkai na ka thaiñ kaba la ïoh ban mihkhmat ïa ka thaiñ ha ka jingïalehkai ïa ka Meghalaya State League (MSL) ba kan poi sha ka thong ha kane ka jingïalehkai.
Ha ka kyrwoh na u President ka seng u Samla Donalson Pyngrope, u la ong ba kane ka jingïoh ka Nongmadan FC ban mihkhmat ïa ka thaiñ ha ka rynsan lehkai MSL ka long hadien bun bun snem ba ki kynhun lehkai na ka thaiñ kim ju ïoh shim bynta ha kane ka rynsan kynjat phutbol ba heh ha ka jylla.
U la ong ba da kane ka jingïoh shimbynta biang ka kynhun lehkai na ka thaiñ ka seng ka dap da ka jingkyrmen ba ki rang lehkai ka thaiñ kin ïoh mynsiem ban trei shitom na bynta ban ïoh lehkai ha ki rynsan ba heh kum ka MSL.
“Ngi khmih lynti da ka jingïoh ka Nongmadan FC ban ïakhun ha ka MSL kan long ka khubor sha ki samla ka thaiñ ba kin trei shitom ha ka kam lehkai phutbol namar ka rynsan ïalehkai na bynta jong ki ka don ba kin sei la ka sap, bad ngi da kyrmen skhem na ka liang ka seng ba ki Aibor Khongji ba thymmai kin mih na ka dong ka thaiñ ha kine ki snem ki ban wan,” ong u Samla Donalson.
Shuh shuh u la khot la wer ïa ki nongshong shnong ka thaiñ ban wan ai jingkyrshan ha ka jingïalehkai kaban long mynta ka sngi ha Madan UUP, Urksew Wahpathaw ha ka por 2 baje janmiet kaba ka Nongmadan kan ïakhun pyrshah ïa ka Shillong Lajong FC.
