Shillong,Naitung 02 : U Symbud Myntri Rangbah ka Jylla ba dei peit ïa ka tnad Transport, Bah Sniawbhalang Dhar u la bthah ïa ka tnad ba kan leh da kaba tyngeh ïa ki kali shimet kiba mih ban kamai lang kum ki kali kamai.
Haba kren bad ki lad pathai khubor ha kane ka sngi Balang, u Symbud Myntri Rangbah u la ong ba ïa kane ka rai la shim hadien ka jingshah pynïap jong u nongwan jngohkai pyrthei na Indore, u Raja Raghuvanshi ha Sohra dang shen.
“Nga la dep ban bthah ïa ki ophisar ka tnad Transport ba kin shimkhia mardor ïa kane ka kam khamtam haba kum kine ki jingshah pynïap ki jia,” bynrap biang u Symbud Myntri Rangbah.
Shuh shuh u ong ruh ba katkum ka aiñ hi, ki kali shimet kim lah satia ban kamai kum ki kali kamai namar ki kyndon ki la don kiba tehlakam halor kane.
“Na ka liang ka sorkar ka la peitngor bha ïa kane ka ishu bad ka la dep ruh ban shong bun ki jingïalang na ka bynta ban pyntikna ba ki kali shimet kim lah ban kamai khlem da ïoh shwa ïa ki jingbit,” u la ong.
Ha kajuh ka por, u Symbud Myntri Rangbah u la ïathuh ba ka sorkar jylla ka la pynap ruh da ka kuna na ka bynta kito kiba pynkheiñ ïa katei ka kyndon khlem da mab ïa ki arshaka kumjuh kiba pyndonkam kum ki kali kamai.
