Ki paidbah ki la ud la lynñiar namar ka jingkiew dor ki marbam mardih, kaba la ktah shibun eh ïa ki duk ki duk ki rangli ki juki, kiba bylla mynsngi bad bam dap miet. Ka jingkiew dor ka la ïai bteng, khamtam ha liang ki jhur ki jhep bad kane ka la lynshop tyngeh ïa ki briew kiba la shu shaniah beit ha u jhur ban bam ja bad ki bym ju phoh sniew ban bam doh ne dohkha mynno mynno ruh.
Ka jingkiew dor na sha kiwei ki jylla ka la ktah ruh ïa ka jylla Meghalaya jong ngi ha kaba ki marbam mar dih ki la kiew syndet. Katto katne ki dor ba la pynpaw lyngba ki lad pathai khubor la pyni ba ka dor jong u kajor ha nongbah Shillong ka long hapdeng 80 haduh 100 ha Ïewduh. Katba ha kiwei pat ki bynta jong ka nongbah Shillong, ka dor ka long hapdeng 100 bad 120 tyngka shi kilo. Yn nang ïakren ïa u kajor, hynrei phai sha ki jhur ba kiba duk basuk ki bam kum u phan, u kubi bad kiwei kiwei ka dor ka long hapdeng 50 haduh 60 tyngka ha Ïewduh katba ha kiwei pat ki jaka jong ka nongbah ka dor ka long 70 haduh 80 tyngka shi kilo.
Ka Meghalaya, kadei ka jylla kaba shaniah khambun ïa u jhur uba wan na shabar, ka jingkiew dor kadei kaba ym lah ban kiar satia bad hap ban ïatyllun lang ha kane ka jingkiew dor ha kiwei pat ki bynta jong ka ri India.
Ki nongkhaïi ki la ïathuh ïa ka daw jong ka jingkiew dor bad kawei na kine, ki la ai daw ba kadei ka jingshlei um ha Assam, kaba la wanrah ka jingjot jingduh ei jong ka rep ka riang, kaba la pynlong ïa ki nongrep ban lah pynmih tang khyndiat u jhur. Kawei pat ka daw ka dei namar ka jingkiew dor ka umphniang petrol bad diesel na ka thma Russia- Ukraine bad kane ka jingkiew dor jong ka umphniang, ka la kyntiew ruh ïa ka dor bai kit bai bah, namar ba u jhur sha Meghalaya u wan na ki jylla West Bengal, Bihar bad Assam.
Kine ki lah ban dei tang katto katne ki daw kiba wanrah ka jingkiew dor ha ki marbam mardih, nalor ka jingkiew dor jong ka doh masi, doh sniang, doh syiar kiba la kiew lypa ha ka jylla naduh kine ki bnai kiba ladep.
Ha ki por baladep, la ju ïohi ba ka sorkar ka la pyrshang ban teh lakam ïa kane ka jingkiew dor, hynrei kam lah satia ban pynhun ïa u paidbah, namar ka jingbuh dor kam shong ha ki bor sorkar, hynrei ka shong ha ki nongkhaïi. Na kata ka daw ka sorkar ka hap ban khot ïa ka jingïalang jong ki nongkhaïi ha man ba kiew dor ki mar ki mata, namar ba lade ka don bor tang khyndiat eh ban leh eiei.
Kumba ka paw hi ba ka sorkar kam don ki kti kiba khlaiñ ban teh lakam ïa kane ka jingkiew dor, ka bynta kaba bun ka shong ha ki kti jong ki paidbah. Kaei kaba kwah ban pynpaw hangne ka long ba ki paidbah nongshongshnong jong ka jylla, ki la dei ban sngewthuh ba lada kwah ban bam jhur, kam dei shuh ba kin shaniah ha u jhur ne ki marbam kiba wan na shabar jylla. Ha ka jylla Meghalaya, kiba bun na ki nongshongshnong kidei ki nongrep bad bun ruh kiba rep jhur, kiba ri sniang, kiba ri masi bad kumta ter ter. Hynrei ka jingtrei pat, la ka long ki nongrep, ne ki nongri jingri, kadei kaba shu leh malu mala tang dep rukom. Kam don kano kano ka rukom rep ban ong kaba lah ban pyndap ïa kiwei de ne ban ïoh die.
Na ka liang ki bor sorkar ruh haba ki ïohi kumne ïa ka jingshah ktah ki paidbah na ka jingkiew dor ki marbam, kam dei shuh tang ban shu pynbieit ba kan kyrshan tyngeh ïaki nongrep tang da i jingïarap iba na i skim iba hapdeng 2 ne 3 hajar, hynrei ka jingïarap kadei ban long kaba radbah shisha, kaba lah ban pynlong ïa ki nongrep ba kin lah haduh ban da pyndap ïa ka jylla hi baroh kawei. Ka jingïarap kumba long mynta kadei kaba shu leh thoh mut thoh mat, tang ban ong ne ban pynpaw ba ka sorkar ka la ïarap ïa ki nongrep.
Nangta haba ki nongrep ki mad ïa ka nem sniew, na ka jinglynshop ki bor ka mariang, ki jingïarap na ka liang ka sorkar ki long kiba rit palat, nalor ka jingpoi ki lad jingïarap ka long kaba slem haduh katta katta. Kaei ba ka sorkar kadei ban leh ka long ban ïarap ïa ki nongrep tad haduh ba kin da lah ban ïeng ha la ki jong ki kjat bad kin long ruh ki nongpyndap ïa kiwei pat. Dei hangta ba yn sa ïohi ïa ka jingbym shah ktah wat lada kadon ka jingkiew jong ki marbam sha kiwei pat ki jylla jong ka ri India ruh.
