Shillong, Nohprah 16 : Ka jingmih bun ki jingkynthoh halor ka jingtreikam jong ka Investment Meghalaya Authority (IMA) ban thied jaka na ka bynta ban pynsuk ïa ki nongwan seng kam ne seng karkhana ha ka jylla, ka la pynlong ïa ka sorkar jylla ban pynshai ba kan ym don satia kata ka jingailad ïa ki nongseng kam lane ki nongbei tyngka kiba na shabar ba kin wan bad lah ban thied jaka katba mon ha Meghalaya.
Lah ban kdew hangne ba hadien ba ka Kynhun Myntri jong ka Sorkar Jylla ka la ai jingmynjur ban pynkylla ïa ki kyndon hapoh ka aiñ Meghalaya State Investment Promotion & Facilitation Act (MSIPF), 2024, ha kaba la ailad sa ïa kawei pat ka tnat Sorkar, kata, ka Invest Meghalaya Authority (IMA) ban thied khyndew, ki la mih bun bha ki jingkynthoh.
Katto katne na ki jingkynthoh ka long ba ka jingailad ïa ka IMA ban thied jaka ka long kumba plie lad ïa ki nongbei tyngka kiba wan nabar ban ïoh thied jaka katba ki mon kaba long pyrshah ïa ki kyndon jong ka Meghalaya Transfer of Land (Regulation) Act.
Shuh shuh ka sorkar Meghalaya ka la pynshai ruh ba ka jingpynlong aiñ ïa ka Meghalaya State Investment Promotion & Facilitation Act (MSIPF), 2024, ka long ban pynsuk ban pynïaid ïa ki kam karkhana bad ki kam seng kam seng jam khnang ba ka jylla kan kiew arted bad ki nongshong shnong trai ri trai muluk kin ïoh kam ïoh jam.
La ïathuh ruh ba ka IMA kan long ruh kum ka shlem ban peit halor ki kam bei tyngka bad ka seng kam seng jam da kaba bud nuksa na kiwei pat ki Jylla ka thaiñ Shatei Lam Mihngi, kumba la kdew tnad DONER jong ka Sorkar Pdeng. La ong ruh ba ka jingpynkylla ba dang shen ïa ka Meghalaya State Investment Promotion & Facilitation Act (MSIPF), 2024, ka long ban ailad ïa ka IMA ba kan thied jaka na ka bynta ban ïoh sdang ïa ki jingseng kam lane ki kam karkhana ha ka jylla.
Ka jingthied jaka da ki tnat treikam ka sorkar ka long ka kam kaba la ïaid bad lypa. Kum ka nuksa, ka Meghalaya Industrïal Development Corporation (MIDC), Meghalaya Tourism Development Corporation (MTDC), bad ka New Shillong Township Development Agency (NSTDA) ki dei ki tnat kiba la ïoh bor ba kin thied jaka lane ban thaw ïa kata ka ‘Land Bank’.
Nalorkata, la ong ruh ba kum ka sorkar jylla kam pdiang ban ong ba ki nongbei tyngka ki lah ban thied hi ïa ka jaka. Wat na ka bynta ki kam seng karkhana, ïa ka khyndew ka shyiap yn ai katkum ki kyndon jong ka Meghalaya Transfer of Land (Regulation) Act.
Lah ban kdew ba ka Meghalaya Industrial & Investment Promotion Policy (MIIPP), 2024, ka don ïa ki kyndon bakyrpang na ka bynta ka jingai kam ai jam da ki karkhana bathymmai. Ka don ruh ia ki kyndon jong ka MIIPP, 2024 kaba kdew shai ba kano-kano ka karkhana kan hap ban ai ym duna ïa ka 90 na ka 100 ïa ki kam ki bym dei kiba shalor (non-managerial posts) ïa ki trai jylla. Nalorkata, 50 na ka 100 ki kam ki jam kiba halor dei ban ai ïa ki trai jylla.
