Kiba ju jia bad ki jingbthah lane ki lad ki lynti ban shim lada jia ba jur bha u slap: DC

Mawkyrwat, Jymmang 16: Ka Deputy Commissioner jong ka South West Khasi Hills District, Mawkyrwat ka la ai ïa kine ki jingbthah na ka bynta ka jingtip ki paidbah bad khnang ba kin dup nang ban phikir bad husiar ïa lade ha ka por ba jur u slap bah, ka lyer, pyrthat bad lei lieh khnang ban lait na ki jingjia kiba sngewsih.
Ki jingtip bad jingbthah kiba dei ban bud ha ka por ba jur slap ki long kawei ka dei halor ki katto kane Kiba ju jia ha ka por ba jur slap kata ka jing-kah-dum bad ka jingbym shai ha ka por ba jur bha u slap, ka jingthut ha ka leit ka wan na ka daw ka jingbym ïaid beit ïaid ryntih ki kali na ka daw ka jingdap um ha surok/ka jingkhyllem jong ki dieng bad ki tnat dieng kaba lah ban wanrah ïa ka jingdheng ki kali.
Nangta, ka jingjur jong u slap ka lah ban ktah ïa ki jingthung jingtep kum ki jhur ki jhep, ki soh ki pai bad kiwei kiwei, ka jingjur u slap ka lah ban ktah ïa ki jingthung jingtep kiba dei ban dang-heh dang-san, ka jingjur slap ka lah ban wanrah ïa ka jinglang ne shlei um ha ki jaka ba long madan, ka lah ban don ruh ka jingtwa khyndew bad ka jingkhyllem jong ki dieng. Shuh shuh ka jingjur slap ka lah ruh ban pynsniew ïa ki surok khyndew, ka jingjur jong u slap bad ka jingjur jong ka lyer ka lah ruh ban pyntwa ne rah ïa ki jingshna kiba la tlot bad synjor, ka lei lieh bad u pyrthat ka lah ban pynmynsaw ïa ki briew bad ki mrad kiba don shabar khlem jingda ne jingker.
Nangta, ki katto katne ki jingbthah lane ki lad ki lynti ban shim lada jia ba jur bha u slap ki long ban bud ïa ki jingbthah kiba ïa dei bad ka rukom ban ñiah kali, lada don kum kita, ban kiar na kaba leit sha ki jaka kiba lang um bad kiba dap um borabor, ban kiar na kaba shong ba sah ha ki jaka kiba la tor ne shong synjor, ban shna ki kynja na la ha ki lyngkha ha shwa ban wan u lap bah.
Ha kajuh ka por ban ker ne da ïa ki jaka thung jaka tep, ban kheit lypa noh ïa ki soh ki pai lane ki jhur ki jhep kiba la long ne man, ban rieh ha ka por ba don u pyrthat lane lei lieh, ban wad jingtip na ka por sha ka por bad ban kiar na kaba leit sha ki wah bah ne wah duid namar ka jingjur jong u slap kan pynshlei ïa ki wah rit ne wah bah.