Nongstoiñ, Jylliew, 08: Ka Ophis u Block Medical Officer Mairang, Eastern West Khasi Hills District, ha ka jingïatreilang bad ka Adolescent Friendly Health Clinic, ka la pynlong ïa ka Adolescent Health Day cum Peer Education Program, kum shibynta ban kynmaw ïa ka sngi pyrshah ïa ka jingpyndonkam ïa u duma lane ka World No Tobacco Day 2025 halor ka phang “Healthy Lifestyle brings Healthy Growth”. Ïa kane ka programme la pynlong ha madan Dommawlum, Pyndengumiong, kaba pynbud pat da ka jingïalehkai football. La pynlong ïa kane ka program kum shibynta ban ai jingbatai pynshai sha ki khynnah samla kiba dang heh dang san ha ka rta, halor ka jingsniew jong ki jingdih kum u duma, u drug bad kiwei ki jingbam kiba pynsniew kiba ktah ïa ka koit ka khiah. La kyntu ïaki khun samla ba ki dei ban kïar na kaba pyndonkam ïa ki jingmlien ba sniew kiba ktah ïa ka lawei jong ki.
Ka jingïalehkai Football ka la long kaba ishongshit bha hapdeng ki khynnah samla kynthei bad shynrang hapdeng jong ka Mairang Block bad ka Mawreng Junior Football Academy.La plie ïa kane ka awareness cum football match da u Additional Deputy Commissioner Bah A.Nongbri ha ka jingdonlang ka Dr P.E Hadia, Block Medical Officer Mairang, Rangbah Shnong jong ka Shnong Pyndengumiong Bah B.Syiemiong, ki nongtrei jong ka health clinic, ki nongtrei ASHA, ki khun samla bad kiwei kiba shah khot sngewbha.Ha ka jingkren jong u bah Nongbri, u la pharia da kaba ong ba kane ka sngi ka long ka ba kyrpang na ka bynta ki khun samla kiba dang dei ban heh ban san ha ka jingmut jingpyrkhat bad ha ka bor met bad ruh kiba dang pynkhreh na ka bynta ka lawei jong ki hadien.
U la kyntu ïa ki ba ki dei ban kiar na ki jingmlien basniew bad ban nym shah ïalam bakla, hynrei ban pynleit jingmut bha tang ha ki jingpule bad ban pyndonkam hok ïa ki sap kiba ki don na ka bynta ka lawei kaba phyrnai jong ki.
