Ka long kaba eh shibun ban pynneh ka koit ka khiah jong ka sniehdoh hapdeng ba jur ka jingdon ka lyer jaboh, ka jingshah ktah ba mih na ka jinglong ka suiñbneng, ka jingjied ka rukom im kaba duna ban tei ha ka liang ka koit ka khiah, bad kiba bun ki jingshah ktah ba paw hapdeng ba nangïaid ki rta.
Kine harum ki long napdeng ki nutrient kiba lah ban pynneh ka koit ka khiah jong ka sniehdoh :
Vitamin A : Ka jingpynrung kane ka vitamin ka dei kaba ïarap halor ka jingpynmih ki cell kiba thymmai bad lah ban tehlakam ki dak ba paw hapdeng ka jingnoh ka rta kum ka jinglong ransti ba paw ha ka durkhmat. U Palong, Phankaro, ki jingbam ba ïoh lyngba ka dud, kajor bad ka pylleng ki dei ki thymmei ba don ka vitamin A.
Vitamin B3 : Ka Vitamin B3 ka don ka bor halor ka jinglah ban ïakhun pyrshah ka jingkiew ka jinglong tyrha bad lah ban pyllait na ka jingmih khñiang ha ka durkhmat. Ki jingbam ba riewspah ban don ka Vitamin B3 ki kynthup u tit, u phan, ka dohkha salmon, u shana budam bad ka dohsyiar.
Vitamin C : Ka dei kaba lah ban kyntiew halor ka jingdon ka collagen bad ka jingdon ki anti-oxidant properties ha ka met, kiba ïarap ban pyllait na ka jinglong tyrkhong ka sniehdoh. Ki soh Citrus, broccoli, sohsaw, u sohmynken jhur, strawberries bad sohpieng ki dei napdeng kiba jur ban don kane ka vitamin.
Vitamin E : Ka umphniang olib, u sohot, sohpieng, palong, riewhadem bad ki shyieng u tiewsngi ki dei kiba riewspah ban don ka Vitamin E. Hapdeng ka jingdon ki anti-oxidant properties, ka Vitamin E ka dei kaba lah ban ai jingïada na ka jingdon ki phlia jakhlia.
Ki jingtah ba la shna bad pynmih lyngba u neem, u tulsi bad shynrai ki dei kiba phi lah ban pyndonkam na ka bynta ka jingsait bad pynkhuid ka jingdon ki jakhlia. Kine ki lah ban sait pynkhuid ki jakhlia kiba lah ban ktah ha ka sniehdoh.
Ki lynti ba lah ban tem ka jinglong sti ka sniehdoh :
Ki jingbam kiba tei bad ka jingjied ka rukom im kaba tei ha ka liang ka koit ka khiah ka long kaba kongsan ba lah ban pynduna ka jinglong ransti ka sniehdoh. Ka long kaba donkam ban kynthup kiba bun jait ki jhur, ki soh, ki soh ehsnep ha ki jingbam ba phi bam. Hashuwa ban mih na la ïing shabar ka long kaba donkam ban tah ki jingtah khmat kiba lah ban ai jingïada na ka jingthang jong ka sngi. Kiar ban dih kyiad bad sikret ban ïoh ka sniehdoh kaba itynnad. Ka jingpyndonkam, da u shynrai, soh avocado, ka aloe vera bad soh mylleng ruh ki dei kiba lah ban ai jingïarap.
Kiwei de kiba lah ban ai jingmyntoi na ka bynta ka sniehdoh :
Ka Dud : ka dei kaba riewspah ban don ka protein bad ka calcium bal ah ban ïakhun pyrshah halor ka jingransti ka sniehdoh, ka jingsait pynkhuid naduh na tynrai ïa ka sniehdoh, ka pyllait ka jingshah ktah ba mih na ka jingthang jong ka sngi bad pynneh ka jinglong um jong ka sniehdoh.
Ka Butter milk : Kane ka dei kaba lah ban pynneh ka jinglong um ka sniehdoh. Ka buttermilk ka dei kaba ju paw ba riewspah ha ka jingdon ki vitamin A, E, B6, bad B12, kiba lah ban wallam ka jingjem bad jlih ka sniehdoh.
U Aloe vera : U dei uba ïarap na ka bynta ban ïakhun pyrshah halor ka jingkiew ka jinglong tyrha bad pynduna ka jingshah ktah ba mih na ka daw ka jingshah thang ha ka sngi.
Ka Ngap : Kane ka dei kaba lah ban maramot halor ka jingshah ktah ba mih ha ka sniehdoh.
Ka Umphniang Tiewsngi : Kane ka umphniang ka dei kaba lah ban ai jingmyntoi shibun na ka bynta ka koit ka khiah ka sniehdoh. Ka dei kaba lah ban ïakhun pyrshah ka jingmih ki khñiang bad ka jinglong tyrkhong ka sniehdoh, ka pynduna halor ka jinglong liprong ka sniehdoh, bad pynkoit na ki jingmong.
Ka jingleh yoga halor ka koit ka khiah ka sniehdoh : Ka jingleh yoga ka dei kaba ïarap na ka bynta ka jingtuid bha jong ka snam bad kane ka dei kaba paw shai halor ka jingïarap na ka bynta ka jingitynnad bad jlih ka sniehdoh.
