Shillong, Naiwieng 10: Ka jingïalang ban ïasyllok ha kaba ïadei bad ki kam jong ki Village Defence Party (VDP) la dep ban pynlong ha shnong Mawlaiteng kaba dang hab hapoh ka Lumdiengjri Police Station.
Ïa kane ka prokram la pynlong da ka ophis Superintendent of Police, East Khasi District.
Ha kane ka jingïalang na ka liang u Additional Superintendent of Police, u Bah G W Lyngdoh u la ong ba ki VDP ki long kum ki païa jong ka imlang sahlang ban pynneh ïa ka shongsuk shongsaiñ ha manla ki shnong ki thaw.
U la ïathuh ba ka Meghalaya Village Defence Organisation Rules, 2008 ka la kdew ïa 10 tylli ki kamram bad ki kam jong ki VDP. U la ong ruh ba ki don 3 tylli ki kamram kiba kongsan kaba ki VDP ki dei ban bud bad kita ki long ban ïarap ïa ki pulit ban pynneh ïa ka shongsuk shongsaiñ, ban wanrah ïa ka shongsuk shongsaiñ ha ka por ba donkam, ban pynlong ïa ki jingïaid pahara ha ki jaka kiba la buh ban ïada na ka jingshah tuh, shah lute bad kiwei pat ki kam kiba long beaiñ bad kumjuh ruh ban ïada ïa ki nongshong shnong na ki jingjia ki kam sniew bad kumjuh ruh ban wad ïa ki lad jingïarap na ki pulit ha kiba bun ki kam.
Halor kane na ka liang u Additional Superintendent of Police u la ong ba ka jingdon jong ki VDP ha ki shnong, ki kam tuh, ki kam lute bad kiwei pat ki kam ba long beaiñ la lah ban tehlakam. Ka jingdon jong ki ruh ka long kaba donkam khamtam ha kaba ïadei bad ka jingshah ktah kti jong ki longkmie bad ki khynnah.
Ha kawei pat ka liang u Bah Khrawbok Sohkhlet Honorary Adviser, Village Defence Organisation, East Khasi Hills district u la ong ba ha ka jingïaid jong ka por ki briew kiba smat ban leh ïa ki kam beaiñ ruh ki la kylla long kiba shalak.
Na ka liang u Bah Sohkhlet u la ong ba ki dkhot jong ka VDP ki ïatreilang bad ki dkhot jong ka Dorbar Shnong bad kiwei pat ki seng kum ka Seng Kynthei bad ki Seng Samla.
“Ki VDP ki dei kiba don ha ka kti ka diang bad ka kti ka mon kiba ïarap ïa ki pulit ban pyndep ïa ki kamram ban tehlakam ïa ki kam beaiñ hapoh ka imlang sahlang,” u la ong.
