Ki trai khyndew ki la ai jaka ban shna pynbeit ïa ka surok Pynursla Bypass: Prestone

Shillong, Rymphang, 13: U Symbud Myntri Rangbah ka Jylla Bah Prestone Tyngsong uba khmih ïa ka tnat PWD (Roads) ha ka sngi Baar u la ïathuh ba ka jingshna pynbeit ïa ka surok Pynursla Bypass, kaba dei ka bynta jong ka Package-III jong ka surok Shillong Dawki, ladep ban ïa pynbeit.
U la ong ruh ba ka jingkynnoh ba la ai jubab ha ka Affidavit hakhmat ka Ingbishar Meghalaya High Court ba ka jingshna pynbeit ïa ka surok na ka bynta ka surok Bypass ym pat lah ban ïapynbeit na ka daw ka jingpyrshah jong ki nongshong shnong ka long kaba ‘bakla’
“Nga sngewkmen ban pyntip ïa phi ba wat ki nongshong shnong bad ki trai khyndew ruh ki la ai ïa ka jingmynjur bad ïa ka jingshna pynbeit ïa ka surok ladep leh da ka tnat PWD bad ka NHIDCL ïa kaba la phah sha ka Ministry of Road Transport and Highways bad sha ka Headquarter jong ka NHIDCL. Dang shen, haba nga dang don ha Delhi nga la shong jingïalang bad ki ophisar ba dei peit bad nga la thikna ba shen ngin sa lah ban ïoh ïa ka mang tyngka,” la ong u Bah Prestone ha ka jingïakren bad ki lad pathai khubor.
“Nga tharai ba ka long kaba bakla (ka jubab ba la ai hakhamt ka Ingbishar). Dang khyndiat sngi, ngi la lum ïa ki rangbah shnong, ïa baroh ki executive member jong ki shnong bad ïa ki trai khyndew, ngi la lum lut ïa baroh bad ngi la leit sorjamin ïa ka jaka ym tang ban shim ïa ka rai na ka dorbar hall ne na ka jaka ba ngi shong hynrei ïa ka jingsorjamin la leh da ka jingsakhi lang jong ki nongshong shnong ryngkat SDO Civil, ADM incharge Revenue, ki nongmihkhmat na ka NHIDCL bad ki Engineers na ka tnat PWD bad ka jingshim rai ka la wan urlong na ka bynta ban pynbeit ïa ka surok jong ka Pynursla Bypass,” u la bynrap.
Katkum ka jingong jongu, ka jingjrong jong ka surok Pynursla bypass ka long kumba 10-13 kilometre.
Shwa kane u Bah Tynsong u la ong, ha kaba sdang ban leh ïa ka jingsorjamin na ka bynta ban pynbeit ïa ka surok Bypass la pynsangeh shwa na ka daw ba ka la mih ka jingbym ïasngewthuh jingmut hapdeng ka NHIDCL bad ki bor synshar shnong.
“Hynrei dang khyndiat bnai, ïa ka jingsorjamin la leh biang bad ngi don na ka Sorkar Jylla ban pynsngewthuh ïa ki rangbah shnong bad ïa ki trai khyndew ba kin ai ka jingïatreilang bad ban peit ruh ïa ka jingdonkam ban shna ïa ka surok Pynursla Bypass,” u la ong.