Nongstoiñ, Nailar, 23: Ka Federation of Khasi Jaiñtia & Garo People Rambrai Circle ha ka sngi balang, ka la leit buh da ka dorkhas sha jingthoh sha ka Head Indian Post Office Nongstoiñ, ban tuklar halor ka jingwan pynbor ki bar Jylla ïa ki Rangbah shnong ka thaiñ Rambrai, ban ai ka jingai jingbit ïa kitei ki bar Jylla ban ïoh rung da kaba suk ha ki post kiba lait thylli ha ki BPO kiba hap ha ki Shnong ka thaiñ Rambrai. Ka seng ka dawa ba dei ban thung da ki trai Jylla bad ki samla ka thaiñ khamtam ha kum kane ka por jong ka kyrduh kam ka kyrduh jam.
Ki nongïalam ka seng haba ïakren bad ki lad pathai khubor, ka pynpaw ruh ka jingïaroh ba ki don ki Sordar ki bym shym treh ban ai ïa ka jingai jingbit (recom-mendation). Ha kajuh ka por ka kyrpad ïa baroh ki Rangbah shnong ka thaiñ ba kim dei ban ai jingmynjur ïa ki bar Jylla, namar ba ïa ki kam ban rah shithi lah ban trei da ki samla trai Jylla.
U Bah Jiedstarlan Lyngkhoi President FKJGP Rambrai, u la ong ba haba ïa kren bad ka khlieh duh hapoh Indian Post Office Nongstoiñ, ka la ong ba lada ki Rangbah shnong kim ai jingbit, kito ki bar Jylla kim lah satïa ban ïoh ban rung ha kitei ki Post. Ka la ai jingmut ba dei ban leit ïakren bad ki bor ba halor ha Shillong.
Halor kane na ka liang ka seng shen kan sa leit ban ïakren bad lada ka Indian post Office kam sngap, ka seng ka maham ba lada jia ei ei ïa kito ki bar Jylla kiba wan knieh ïa ka pliang ja jong ki trai Jylla, ka Indian post office kan hap ban shim jingkit khlieh.
Ha kajuh ka por ka seng ka maham ïa kito ki bar Jylla ki ba wan pynbor ïa ki Rangbah shnong ka thaiñ, ba ki dei ban sangeh mardor ban wan pynbor, lym kumta ka seng kan leh da kaba tyngeh.
