Ki tamasa ba pynlong da ka Sorkar ki long tang kum u ‘Pain killer’ ban pynklet ïa ka bamsap: President VPP

Shillong, Nohprah 12 : U President ka Voice of the People’s Party (VPP), Bah Ardent Miller Basaïawmoit u la kynnoh ba ki tamasa bapher bapher ba pynlong da ka sorkar jylla ki long tang kum u ‘Painkiller’ ban pynlong ïa ki paidbah ba kin klet noh ia ki kam bamsap ha ka jylla.
Ïa kane, u Bah Ardent u la pynpaw ha ka jingïalang pynithuh kyrtong jong ka party na bynta ka elekshon MDC kaban long ha u Rymphang – Lber 2025.
Haba kren ha kane ka sngi, u Bah Ardent u la kynthoh ruh ïa ka sorkar jylla da kaba kynnoh ba kam shym la mang ïa ki skim kam pynroi ha kito ki constituency ba mih khmat da ki MLA na ka liang pyrshah.
U Bah Ardent u la kam ruh ba haduh mynta ki paidbah ka rilum Khasi bad Jaintia ki la shongshit ha ka lyer VPP bad dei na kane ka daw ka sorkar jylla ka la pyrshang ban pynlong da kiba bun ki tamasa khnang ba ki paidbah kin klet noh ïa kane ka lyer VPP.
“Ka sorkar jylla ka la wad ki lad ki lynti kumno ban pynlong ïa kiba bun ki tamasa haduh u Kyllalyngkot 2025 bad poi haduh u pud ba kan phah khang ïa ki skul ruh,” u la kynnoh shuh shuh.
Shuh shuh u buh jingkylli ruh la kito baroh kiba leit sha katei ka tamasa kin kyrshan ïa ka National People’s Party. Kumta, u la ong ba kine ki tamasa ki long tang kum ki dawai kiban pynklet ïa ki paidbah shaphang ka bamsap, ka jingduk bad ka jingkiew ki kam kyrni drok ha ka jylla.
U ong ruh ba na ka liang ka VPP kan ym ai satia ïa kum kine ki ‘painkiller’ sha ki paidbah ka jylla hynrei kan pyntikna ba ynda ki la ïohlad ban synshar ïa ka jylla kin pyntikna ba kan don ka synshar kaba khuid, nangta ban rat dyngkhong ïa ka jingduk bad ban pyntikna ba kan ym don shuh ka bamsap ha ka jylla.