ïa ka MPSC la dei ban jer kyrteng da ka ‘Mostly Politician’ Service Commission: VPP

By Mawphor Editor On Dec 13, 2024

Shillong, Nohprah 12 : Ka Voice of the People’s Party (VPP) kaba don ha ka Liang Pyrshah ka la kynnoh ba ka Meghalaya Public Service Commission (MPSC) ka shakri ban pynsngewbha ïa ki politishan bad ïa kito kiba don ha ka bor bad ong ruh ba kan jin da la bha bad jer kyrteng noh da ka ‘Mostly Politician’ Service Commission.
Kane ka jingkynthoh ka dei halor ka result written test jong ka eksam MCS.
“Ka MPSC kadei ban shakri ïa ka jylla bad ïa ki paidbah nongshong shnong da kaba thungkam da ki briew kiba tbit bad kiba lah. Hynrei lada ka bteng ban treikam da kaba pynhun ïa ki politishan bad kito kiba don ha ka bor, kan bha ban ai kyrteng noh da ka ‘Mostly Politicians’ Service Commission,” ong ka VPP ha ka kyrwoh.
Shuh shuh la ong ruh ba ka thong jong ka MPSC ka long ban wanrah ka jingtreikam kaba khuid bad kaba long katkum ka jinglah ha ka rukom thung kam. Ka MPSC kam dei satia ka nongkynti shimet jong kano kano ka sorkar ha ka bor, sengbhalang lane ki sengsainpyrthei. Kadei ban don ïa ka jingtreikam ka bym shah liang bad ban pyllait ïalade na ka jingdon jingïadei bad kino kino ki party.
Na ka liang ka VPP ka kynnoh ruh ba ka result jong ka eksam written test MCS kaba la pynlong da ka MPSC ka la wanrah ïa ka jingkylli na kiba bun kaba pynlong ïa kiba bun ki kyrtong ban sah umdum.
“Ka dei kaba la tip lut ba kito kiba don ha ka bor ki donkti ha kane ka rukom leh shilliang da kaba phaikhmat tang sha kito kiba don jingïadei bad jan bad ka sorkar, kumta ka MPSC ka la duh ïa ka jingshaniah jong ki samla,” bad ong ruh ba da kaba peit na ka result jong ka MCS bun ki la sngew tikna ba ka don ka jingpang kaba shyrkhei kaba ktah ïa ka MPSC.
Da kaba dawa ba ka MPSC ka dei ban pynpaw pyrthei katno ngut ki kyrtong kiba la shah jied bad shah thung kam, bad katno ka cut-off mark, na ka liang ka VPP ka ong ruh ba ka MPSC kam lah ban buhrieh ïa ka hok shimet jongno jongno,bad naba kadei ka jaka treikam ban shakri paidbah kumta ka don ïa ka kamram ban trei da kaba khuid ba suba, ka hok bad ka jingbiang jingkheiñ.
Kane ka long katkum ka kyrwoh ba la phah da u Bah Ubahunlang Dkhar, Tmar, Member Media Cell VPP.