Ka jylla Meghalaya ka dei ka jylla kaba shaniah ïa ka leit ka wan bad ka kit ka bah tang ha ki surok namar lait noh ha ri lum Garo ba la don ka lynti rel ha ri lum Khasi bad Jaintia haduh mynta dang shaniah beit tang ha ki surok namar wat ka kad liengsuiñ ruh kam pat dei kaba heh bad kam pat dei kaba treikam baroh 24×7.
Hooid lada phai sha ki surok bah jongka jylla bad jongka sorkar pdeng ym lah ban len ki la bha mynta bad la suk ka leit ka wan bad wat kiba ym pat dep shna ruh ka jingtei ka jingshna ka dang ïaid shakhmat. Hynrei lada phai sha ki surok kiba pynïasoh ia ki shnong ki thaw, ki dong ki shnat hapoh ka jylla la lap ba kiba bun ki dang sniew bha khamtam ha kito ki constituency kiba ym shym la mihkhmat da ki MLA na ka NPP. Kaei ka daw tip tang para MLA hi.
Kane ka dei ka aiom ba dei ban pynbha ïa ki surok hapoh ka jylla namar ba dang rang ryngkhiang ka bneng hynrei kaba lyngngoh ka long ba bunsien la ju ïohi ba ka jingpynbha ïa ki surok ka sdang beit ynda la jan ka aiom slap. Don aiu ha lyndet jongkane hato ka dei ka jingïasngewthuh hapdeng ki engineer bad ki kontraktor khnang ban ïoh maramot man la u snem ïa kajuh ka surok, ka long ka jingkylli kaba don hakhmat eh.
Lada phai ha sor bad ha khap sor hadien ba la dep tih pynjot ïa ki surok da ki kontraktor ka PHE ban pun ïa ki pipe um kiba heh, ha ka jingshisha ka jingïakut ka long ba ki dei ban pynbha biang ïa ki surok, hynrei kat shaba leit ba wan ha kane ka nongbah Shillong la ïohi ba ka rukom pynbha ïa ki surok ka long kaba torti bha bad la lap ruh ba bun sa tang ki thliew ki syar ha man la ki jaka. Hato ki bor pynïaid ka PWD kim lah sieh ban bud dien ne peit ha ka por ba tih bad pynbha ïa ki surok ynda la dep pun ïa ki pipe.
Ka long kaei kaei kaba sngewsih ban ïohi ba kam don satia ka jingïatrei lang hapdeng ki tnad sorkar bapher bapher khamtam hapdeng ka tnad PHE bad PWD namar kumba la ju kdew bad thoh na ka por sha ka por i kumba kine ar tylli ki tnad sorkar ki ïa pyni bor pynban para ma ki katba kiba jynjar pat ki dei ki paidbah. Ha ka jingshisha baroh ar ki tnad ki dei kiba shakri ïa ki paidbah kumta ki la dei ban ïatrei lang da kaba ïa kylli pyrthew ne ïamir jingmut shwa ban leh ïa kano kano ka kam, hynrei bunsien la ju ïohi beit tang shu la dep pynbha surok ka tnad PWD tang hadien shi taiew ne ar taiew la wan sha ka PHE ryngkat ka puh shilum ban khlong ïa ki surok. Balei kane ka leit jia kumne na ka por sha ka por.
Kumba la kdew ba ha ka jylla ka kit ka bah bad ka leit ka wan ka dang long beit da ki surok kumta haba bha ki surok sngewtynnad ban shong ban ]iah kali ruh bad kloi ruh ka leit ka wan. Hynrei haba sniew ki surok ym tang ba slem ka leit ka wan ka ktah ruh sa ïa ka koit ka khiah ki paidbah khamtam kito kiba shitom budlum ne ki kynthei briew kiba ym lah ban shong kali jngai ne ha ki surok kiba khoh ruh khoh ram.
Ka jingkyntu ïa ki bor ba dei peit ba ki dei ban shim khia ban ïatrei lang na ka bynta ka bha ka miat jong ki paidbah hi. Nalor kata ban ïatrei lang ruh ban sdang ïa ka jingsiang rong ha ka por ba rang ryngkhiang ka bneng khnang ba ki surok kin neh bun snem ym tang shisnem la hap ban maramot biang ïa ki. Kane kan ïarap ïa ka sorkar lehse ban ïoh pynïar ïa ki kam shna surok sha kylleng ki jaka kiba ym pat poi surok ne kiba dang poi lehse tang ki surok khyndew. Namar lada lait ban maramot man la u snem ha ka jaka ban pynlut hajuh shi hajuh la ïoh ban pyntrei pat sha kiwei ki jaka.
