Ka jingïapynbeit pud ha ka kyllla kaba nyngkong na ka bynta ki hynriew tylli ki jaka ba la ithuh ba ki don hapdeng ka jingïakajia pud hapdeng ka Jylla Meghalaya bad ka Jylla Assam kam shym la pynhun satia ïa ki paidbah nongshong shnong jong ka Jylla Assam bad ka Jylla Meghalaya kiba shong shnong ha ki shnong khappud jong kine ki ar tylli ki Jylla.
Kane ka jingïapynbeit pud ka la pynïam kthang ïa ki nongshong shnong ki ban sa kylla nongwei bad ki ban sa shah khynniat jubor sha Assam namarba katkum ka jingïasoi ïa ka Memorandum of Undetstanding (MoU), na ka jaka kaba ïar 36.79 sq km kaba don ha ka jingïakajia pud, Assam kan ïoh 18.51 sq km katba ka Meghalaya kan ïoh 18.28 sq km. Hapdeng kine ki bynta, da ki phew tylli ki shnong kiba ju don baroh shikatta hapoh u pud u sam ka Jylla Meghalaya kin sa shah khynñiat noh shapoh ka jylla Assam ynda ka tnat Survey of India ka la pyndep ïa ka jingsorjamin na ka bynta ban pruiddak ïa u pud u sam uba thymmai hapdeng kine ki ar tylli ki Jylla.
Hato ka Sorkar Meghalaya Democratic Alliance (MDA) kan sngap ïa ka jingdawa bad ïa ka jingkyrpad rit jong ki 18 tylli ki shnong Khasi kiba don ha ka Raid Nongtung, kaba la ithuh kum ka Block-II ba kin wan phai biang sha ka Jylla Meghalaya ha kane ka jingïapynbeit pud?
Ka Block II, ba la jer kyrteng ha rngai da ka Sorkar Meghalaya, ka don haduh 213 tylli ki shnong bad ka jingheh kaba ïar 384 Square Miles. Kine ki shnong kiba hap hapoh ka Raid Nongtung ki dei kiba la don naduh hyndai hynthai naduh ba ka Meghalaya kam pat ïoh ïa la ka jong ka Jylla. Kine ki 18 tylli ki shnong ki kynthup ïa ka Sabuda, Jatalong, Madan Umwang, Khlieh Umwang, Umlaper, Laru, Umtlieh, Ummat, Umru, Umshadktad, Pdengtliej, Umhi, Itpatung, Umsder, Umtyrshing, Umsaw Lumdorbar, Mawsladieng bad Imsohlaper.
Ha kine ki 18 tylli ki shnong ka jingdon jong ki Khasi ka long kumba 9000 ngut kiba ju im da ka rep ka riang bad kiba shong shnong ha kine ki 18 tylli ki shnong.
Ka jingkylli kaba mih mynta ka long hato kine ki khyndai hajar ngut kin ïoh neem ïa ka jinglait luid ban long trai halor ka khyndew ka shyiap kumba long hapoh ka Jylla Meghalaya namarba ka rukom bat khyndew ha Rithor Assam ka ïapher haduh katta katta na ka Jylla Meghalaya.
Toi, watla ki don ki Khasi kiba shong basah ha Barrack Valley hynrei kine ki im ki sah bad kim ïoh satia ka jinglait luid kumba ka long hapoh ka Jylla Meghalaya namarba ka Khlaw kaba ki rep ki riang ka dei ka jong ka Sorkar.
Ka jingshah ieh sharud jong ki Autonomous District Council bad ki Khlieh nongsynshar jong ki Hima ha ka jingïapynbeit pud hapdeng ka jylla Meghalaya bad ka Assam ka long thik kumba ibeiñ ïa u trai jaka. Lehse jin lada ka Sorkar MDA ka la ïasyllok lang ryngkat ryngkat bad ki Syiem, ka KHADC bad ki nongsynshar jong ki raid bad ki shnong kan ym wanrah ïa kane ka jingsuhsat jong ki paidbah kiba shong basah ha ki shnong khappud.
Ka jingpynbna jong u Myntri Rangbah ka Jylla ban sdang ïa ka jingïapynbeit pud hadien ka jingrakhe ïa ka Independence Day ka la pynieng skhor ïa ki shnong kiba kham jwat ha ka jingïakynad halor u pud u sam namarba ki Khasi kiba shong basah ki shong kiba ha kine ki jaka kim pyneh dohïap bad ki kyrngah beit ban shah khynñiat sha Assam.
Naduh ba sdang, ki paidbah kiba shong basah ha ki shnong khappud ki buh ïa ka jingkylli hato kano ka rukom ka Sorkar Meghalaya bad ka Sorkar Assam ki ïapynbeit ïa pud u sam namarba ka Jylla Meghalaya kam ju kyntur pud hynrei ki jingshah pyndik bad ki jingkyntur pud ka jia beit tang na ka liang jong ka Sorkar Assam.
Ka Sorkar Jylla kam dei shuh ban shu buh sharud ïa ki Khlieh Nongsynshar, ïa ki Autonomous District Council ha ka jingïapynbeit pud ha ka kylla kaba ar hynrei lym kumta, ka jaka ka puta kan sa syntuid ei sha ka Jylla Assam bad ka jingpyrta jong ki paidbah ka Meghalaya ba wat shi inshi ruh ka khyndew kam dei ban leit sha Assam kan sa shu long tang ka jingpyrta ha ri kynjah.
