Ki shipai BSF kin lah beit ban tem ïia ki jingjia ha khappud ka Bangladesh ong u MP

Shillong Jymmang 26: U MP Rajya Sabha ka jylla Dr WR Kharlukhi mynta ka Lah Sngi U Bleri ula pynpaw ïa ka jingskhem jingmut ba ki shipai Border Security Force (BSF) kila biang eh ban tehlakam ïa kano kano ka jingjia ha ki thaiñ khappud bad ka ri Bangladesh ban pynthikna ïa ka jingshngaiñ bad jingïada ïa ki paidbah ka Jylla bad ïa ka ri baroh kawei.
“Ki Border Security Force ki don ban shimkhia ïa kano kano ka jingjia bad ngam ïohi ban don kano kano kaba ngi dei ban khuslai” ong u Dr Kharlukhi haba ïakren bad ki nongthoh khubor.
Ula bynrap, “ïa nga hi, nga tharai ba kan bha shibun ban kylli na ki briew kiba sah ha ki thaiñ khappud namar kin tip kham bha hynrei na kaei kaba nga ïohi na jngai ka long ba ki don hangtei ban leh ïa la ka kamram bad nga kyrmen ba kila trei ïa ka kam ka jongki”.
U Dr Kharlukhi ula pynpaw ba ka ri Bangladesh ka don hapdeng jong ka kynrum kynram bad ula ong, “To ngin ïa peit shwa nyngkong. Katkum ka jingsaphriang, nga lah ïohi ba kila ong ba u Chief Adviser ula kwah ban iehnoh ïa ka kam, kan ym lah ban jia. Nga tharai ba kin ïaleh ban pynneh ïa ka jinglong jingman. Kumta ngin sa ïa peit, ngi ngin ïa ap bad ban peit ïa kaban sa jia”.