Ki samla ki donkam ki nongkdew bad nonglam lynti hadien ba ki la pyndep ïa ki jingpule bapher bapher

Nongpoh, Risaw 07: Kum shi bynta ban pynshlur bad ai mynsiem ïa ki samla pule ban kin nang ban jied ïa ka lynti kaba pynpoi sha ka jingjop ha ka jingim, ka Ri-Bhoi Socio-Economic & Youth Development Society (RSEYDS) ka la pynlong ia ka ‘career guidance cum awareness program’ ha Holy Angel Secondary School, Bhoirymbong.
La don ryngkat ha kane ka prokram da u MLA ka Umroi, Bah Damanbait Lamare kum u kongsan, ka Principal ka Holy Angel Secondary School, ka Jaimol James, u President ka Society, Bah Comfort Rympei, bad u Vice President Bah Pyrshahbor Rympei haka jingdon ryngkat lang ki khynnah skul ki nonghikai.
U Bah Damanbait Lamare, ha ka jingkren jong u, u la ban khia ïa ka jingdonkam jong ka jingtrei shitom ha ki jingpule bad ka sap kaba ai da u Blei, ban poi sha ka jingjop. U la pynpaw ruh ba lada ki khynnah skul ki don jingangnud ban jop bad pyndonkam hok ia ka sap jong ki, kin lah ban poi sha kata ka thong kaba ki kwah, da ka jingialam lynti jong ki riew shemphang bad kum kitei ki jait prokram ki long shisha ka jingkyrkhu ïakiba bun ki khun samla khamtam hadien ba kila dep ki jingpule na uwei u mawjam sha uwei pat.
Ha katei ka prokram, la wan ruh ban ai jinghikai da u Dr. Maxwell Lyngdoh bad Bah Comfort Rympei, ki la ai jingpynshai halor ki jingpynkhreh ha ka jingim bad la pynshlur ïa ki khynnah skul ban long kiba trei shitom bad kiba don jingthmu ban poi sha ka jingjop ha ka jingim bad kin nang ban jied ïala kynti haka jingim jong ki.
Ki la pynpaw ruh ba kum ki samla pule ki donkam ïaki nonglam lynti ne kiba kdew lynti shano ban leit hadien ba kila pyndep ïaki kyrdan pule bapher bapher ba katei ka jait prokram ka long shisha ka jingkyrkhu ïaki samla pule ba kin tip ïaka lawei shano ba kin leit katkum ka jinglah jong ki.