Ki samla ki dei ka spah bah jong ka jylla, ka Sorkar kan pyndonkam hok ïa ki: CM

Tura, Risaw 19: U Myntri Rangbah ka jylla u Conrad K Sangma mynta ka sngi Palei ula ong ba ki samla ki dei ki spah bah jong ka Jylla bad ka Sorkar ka la shim khia ban pyndonkam hok ïa ki sap bad ki phong ba ki don khnang ban roi ban kiew ka jylla.
“Ka dei ka kamram jong ngi kum ka Sorkar ban pynthikna ba ngin buh hakhmat eh ia ki samla ha kano kano ka kam ba ngi leh na ka bynta ka Jylla….don ki khep ba ka Sorkar ka pynleit jingmut palat sha ka synshar khadar ban sam skhim. Ka Sorkar sam skhim hi ka dei ka lynti kaba khim ban ïakhmih namar haba phi peit ïa ki skhim, phi kwah tang ban pyntrei ïa ki…bad phin ym sngewthuh ïa ka jingmut jong ka jingpyntreikam ïa ki skhim. Hynrei, ngi la buh mynta ïa ki samla hakhmat eh jong ki bad sa shim ïa ka rai na ka bynta jongki” ula ong.
U Myntri Rangbah ka Jylla ula kren ïa kine ki kyntien ha ka jingïalang pynhap pyrda ïa ka jingrakhe dap 50 snem ne jubili ksiar jong ka Meghalaya Board of School Education (MBoSE) ba long mynta ka sngi ha Tura.
“Ka dei ka kamram jong baroh ki kynhun kiba don bynta ban leh ïa la ka bynta ha ka ban pynthikna ïa ka jingsaiñ dur bad ïalam lynti ïa ki samla ba kin long kiba lah ban tei, kut jingmut, ieid ri, long adkar bad ki nongshong shnong kiba tieng ïa u Blei” ong u Myntri Rangbah.
Kane ka jingrakhe ba lai sngi jong ka MBoSE kaba la kut mynta ka sngi ka dei kaba la wan ïashim bynta ruh da u Myntri ka Tnad Pule Puthi u Rakkam A Sangma, u Chief Secretary ka Jylla DP Wahlang napdeng kiwei pat ki kynrem ki lyndan bad ki Ophisar ka Jylla.
“Ka Meghalaya ka dei ka Jylla kaba rit haba nujor bad kiwei pat ki Jylla hapoh ka Ri kum ka Uttar Pradesh..kumta, khnang ba ka Jylla kan poi ha kliar jong ka jingjop bad ka roi ka par, ngi hap ban pynthikna ba ngin lah pynmih ïa ki nongshong shnong kiba shemphang khnang ba kin lah ban noh synñiang sha ka roi ka par jong ka Jylla” ong u Conrad haba pynpaw ïa ka thong jong ka Jylla ban long kawei napdeng ki 10 tylli ki Jylla ba ha khlieh duh hapoh ka Ri.
U Myntri Rangbah ula ai ruh ka jingithuh ïa u synñiang jong ki nongïaleh ban ïoh ïa ka jylla ba pura bad ki nongïalam, kiba wat hapdeng shibun ki jingeh, ki la lah ban pynwan dur ha ka ban sdang ïa ka MBoSE ha u snem 1973, mynba ka Jylla ka dang shu kha da ka jingphiah na ka Assam.
“Nga kwah ban ai burom ïa baroh ki nongïalam jong ngi kiba la aiti shibun eh ha ka ban shim ïa ki rai kiba wanrah jingkylla wat hapdeng ki jingeh bad ki jingduna ba bun ha katei ka por, ban pynlong ïa ka MBoSE ban kot haduh une u mawmer” ula ong.
Kiwei pat kiba la ai jingkren ki kynthup ïa u Myntri ka tnad Pule Puthi Rakkam A Sangma, u Chief Secretary ka Jylla DP Wahlang bad kiwei kiwei.
U Bah Wahlang haba ai jingkren, ula ong ba ka jingdon ki briew ba la nang pule bad thoh (literacy rate) ha Jylla ka la kiew na ka 24.49% sha ka 80% haduh mynta da ka jingnang bun ki jaka pule na ka 40-50 tylli sha ka 2923 tylli kiba la ïasoh bad ka MBoSE ha kaba 1816 ki dei ki skul Secondary bad 421 ki dei ki Higher Secondary School.