Ki samla ka Jaidbynriew ki shah hiar thma ha u drok, rai ka FKJGP kan mih ïakhun
La pynskhem ïa ki nongïalam ba thymmai ka Umling Circle
Nongpoh, Naitung 05: Hadien ba la kut ka samoi treikam jong ki nongïalam barim ka FKJGP Umling Circle, ki nongïalam ka FKJGP Sengkmie bad ka FKJGP North Khasi Hills District mynta ka sngi kila hiar sha ka shnong Umling ban pynskhem pat ïa ki nongïalam ba thymmai jong ka Circle na ka bynta ka samoi treikam 2025 haduh 2028.
Ha kane ka jingïalang ba la pynlong ha iing Dorbar ka shnong Umling, la sakhi lang ruh daka jingdonlang u Samla Varzeleno Lyngdoh, Office Secretary ka Sengkmie, bad ki nongïalam jong ka North Khasi Hills District ba kynthup ïa u Bah Luistar Lyngdoh President, Bah Lumlang Mawnai, Samla Ricky Majaw, Samla Gabriel Sun, Samla Kitborlang Suting bad kiwei kiwei.
Ki nongkitkam ba thymmai ba la pynskhem hapoh FKJGP Umling Circle ki kynthup ïa u Samla Banroy Wahlang kum u President, u Carnilos Lyngdoh kum Senior Vice President, u Shemphang Wahlang kum Vice President, bad u Precious Syiem kum General Secretary, ryngkat bad kiwei pat ki dkhot. La pynskhem ïa kine ki nongïalam da u Samla Khrawkupar Nongsiej, uba dei u Chief Organizing Secretary jong ka FKJGP Sengkmie.
Haba kren ha kane ka jingïalang, u Samla Khrawkupar Nongsiej u la pynpaw ka jingsngewkmen kaba khraw ba ki samla ki dang don ka jingkloi ban shakri ïa ka jaitbynriew lyngba ka FKJGP naka bynta ki dawbah jong ka jaitbynriew.
Kum u nongïalam ka seng u la pynpaw ruh ka jingsngewkhia ha kawei ka liang namar ka jingjyllei jong u drok bad shah hiar thma jong ki khun samla ka jaitbynriew, watla ki khun samla jong ka jaitbynriew ki dei kiba shlur bad kiba trei shitom bad u la ong ruh ba kum ka seng kam shym shong kli kti, hynrei kan iai trei borbah ban tehlakam ïa kane ka jingeh bad ban ai jinghikai ïa ki samla ba kin long kiba don akor, tipbriew-tipblei bad kiar na ki rukom im ba sniew.
Shuh shuh, u la kyntu ïa ki nongïalam ba thymmai ba kin long nuksa naduh rympei, namar kum ki nongïalam ka jingkitkhlieh kam kut tang ha ka kyrteng, hynrei ka long ruh ban pynpaw da ka akor bad ka jinglong ba shai. U la ai mynsiem ruh ïa kiwei pat ki samla ban wanrah ka jingkylla ha ka imlang ka sahlang da ka jingtrei hok, na ka bynta ka bha ka miat jong ka jaitbynriew bad ki pateng ban sa wan.