Ki riewlum ki don bha ïa ka sap ïalehkai – ong ka President ka Ri shwa ban plie ïa ka Meghalaya Games ha Tura

Tura, Kyllalyngkot 15 : Ka janmiet ban sah kynmaw pateng la pateng hadien ba ka President jong ka ri, ka Droupadi Murmu ka la plie ïa ka pyrda ïa ka lympung ïalehkai 5th Meghalaya games 2024 ha PA Sangma Stadium kaba ha Tura, West Garo Hills District.
Watla ka janmiet ka long kaba khrïat hynrei kane kam shym la theh umpjah satïa ïa ka mynsiem ki 3000 ngut ki khun samla kynthei bad shynrang na baroh kylleng sawdong jong ka Jylla kiba la ïalum lang ban sei madan ïa ki sap ba nylla ka jong ki.
Haba kren kum ka kongsan, ka President ka pynpaw ïa ka jingkmen ba kan ïoh ïa kane ka kabu ksïar ban plie ïa ka pyrda ïa kane ka lympung hapoh katei ka Stadium kaba la ai kyrteng ha ka nam bad ka burom ka jong u PA Sangma, uba la long u Myntri Rangbah bad kumjuh ruh kum u Speaker barim jong ka Lok Sabha bad uba kylla long u Speaker ba nyngkong eh na ka thaiñ shatei lammihngi.
Ka President ka la ban jur ïa ka jingdonkam ban kyrshan bad ban ai mynsiem ïa ki samla riewlum ba don sap khnang ban saiñdur ïa ka jingim ïalehkai kaba pura ka jong ki.
Kumta ka kyrmen ba ka lympung Meghalaya Games kan long ka rynsan ka ban ai mynsiem ïa ki khun samla nangta ban phrang ïa ka mynsiem ïakhun bad ruh ban wanrah ïa ka jingkiew jong ka sports ha baroh ki lïang.
Na ka lïang u Myntri Rangbah ka Jylla u Conrad K Sangma u la ai khublei ïa ka President kaba la lah ban ïadon byntalang ha kane ka janmiet ban plie ïa ka pyrda ïa kane ka lympung kaba long ruh ka sien kaba nyngkong ba kat ka nongïalam ba hakhlieh duh jong ka ri ban ïuhkjat ha sorbah Tura na ka bynta ban plie syndon ïa kane ka lympung ba heh tam jong Jylla.
Shuh shuh u Myntri Rangbah u la ong ka jingpynlong ïa kum kane ka lympung ym dei ba la shu pynlong hynrei ka dei kaba ka sorkar ka bet ïa u symbai ha ki pateng ki ban wan da kaba plielad ïa ki ba sei bad pynpaw pyrthei ïa ka sap ha madan ha ka lïang jong ka sports.
“Ha kine ki ar samoi ka jinglong Myntri Rangbah ngi la lah ban tei ïa kiba bun ki jaka ïalehkai bad ngi khmih lynti ha kine ki san snem ki ban wan ngin dangïai bteng ban pynurlong ban nangtei ïa ki jaka ïalehkai bapher bapher ha ka Jylla hi baroh kawei.”
“Nga ai khublei ïa baroh ki dkhot jong ki komiti treikam bapher bapher kiba la duh dem duh thïah tang namar ban trei shitom ban pynlong ïa kane ka lympung kaba jop.”
Ha kawei pat ka lïang u Myntri ka tnat Sports and Youth Affairs u bah Shaklïar Warjri u la ong, “Nga ieng hangne hakhmat jong phi kum u Myntri jong ka tnat Sports, da ka mynsiem kaba rhem ban sakhi ïa ka jingsdang jong ka 5th Meghalaya Games, kaba ka jingpynkhreh ïa ka, ka la wan na ki jingïatrei lang jong baroh ki shnat treikam sorkar, ki volunteer bad ki khynnah ïalehkai naduh ba la sdang thang ïa u dongmusa kaba tehsong ïa baroh ki kynhun jait bynriew na ka bynta ban tehsong ïa ka Jylla baroh kawei.”
Ha kane ka jingïalang la ioh ïa ka kynrtien pdïang burom na ka MP ka Tura Parlïamentary Constituency ka Agatha K Sangma, ka jingkren na u Lat ka Jylla u Phagu Chauhan.
Hadien kane ka la don ka jingïaid ban pynithuh ïa lade da ki samla kynthei bad shynrang na baroh ki district jong ka jylla ba la wan ban ïashim bynta ha kane ka lympung bad bynrap da ka jingshad tynrai jong ki paid Garo, Khasi bad Jaintïa ne ka shad Wangala, shad Mastieh, shad plïang.