Shillong, K’lyngkot 24 : U Myntri ka Tnad Social Welfare Bah Paul Lyngdoh ha ka sngi Balang ula ong ba ka Sorkar kan sa shim ïa ka rai da kaba pynshong nongrim kat kum ka jingai jingmut jong ka Search Committee bad kumjuh ruh ïa ki aplikeshon jong ki riew shimet ban thung kum ka Chairperson ba thymmai jong ka Meghalaya State Commission for Women (MSCW).
Haba ïakren bad ki nongthoh khubor, u Bah Paul u la ïathuh ba ka Tnad ka la dep pynmih ïa ka jingpynbna paidbah halor kane ka kam bad haba kut u Kyllalyngkot, yn sa pyndep noh ïa ki kam baroh.
U la pyntip ba ka Sorkar ka la rai ban ailad wat ïa ki riewshimet, ki bym shym la shah jer kyrteng ha ka Search Committee ban thep aplikeshon, khnang ban nym don mano mano ruh ki ban sngew ba ki la shah pynduh ïa ka lad ban aplai ïa ka kam.
“Ngi la ïoh ïa ki jingtip ba ki don ki briew kiba sngew ba ki biang ban bat ïa ka kam hynrei kim shym la shah jer kyrteng ha ka Search Committee. Kumta ban ailad ïa baroh, ngi la plie ïa ka jingkhang ïa baroh bad ka Sorkar kan sa shim ïa ka rai halor ka jingai jingmut ka Search Committee bad ruh ki aplikeshon jong ki riew shimet” ula ong.
Haba kylli, u Myntri ula ong ba ka Sorkar kan sa lah ban jied ïa ka Chairperson ba thymmai jong ka MSCW hapoh ka taiew ba nyngkong jong u Rymphang.
