Ki projek ha New Shillong ki dei ki nongrim ban tei ïa ka lawei jong ka Meghalaya: Conrad

Shillong, Naitung 14: U Myntri Rangbah ka jylla, Conrad K. Sangma, ha ka sngi Baar u la leit jurip ïa kiba bun ki projek ba kongsan kiba dang shna ha New Shillong, da kaba pynskhem biang ïa ka jingangnud jong ka Sorkar ban tei ïa ki jingtei paidbah kiba thymmai ban pynkhlaiñ ïa ka synshar paidbah, ban pynbha ïa ki jingshakri paidbah bad ban kyrshan ïa ka jingroi kaba neh jong ka Meghalaya.
Ha kane ka jingïalang bishar ïa ka jingïaid shaphrang ki projek la ïadonlang u Chief Secretary, u Commissioner & Secretary ka Urban Affairs Department, ki heh ophisar sorkar bad ki nongmihkhmat jong ki agency kiba pyntrei ïa kine ki projek.
Ha ka jingjurip, u Myntri Rangbah u la leit peit ïa ka New Secretariat Complex, ka Unity Mall, ka Sports Complex ha Umsawli, bad kiwei pat ki projek kiba dang ïaid shakhmat hapoh ka New Shillong Township.
Ha ka New Secretariat Complex, u Conrad u la bishar ïa ka jingïaid shaphrang jong ka jingtei bad u la bthah ba dei ban pynthikna ïa ka jingbha tam ha ka rukom trei bad ban pyndep ïa ka projek ha ka por kaba la buh. Ynda la pyndep, kane ka Secretariat kan long ka jingïing treikam sorkar kaba katkum ka juk ba mynta, kaba pynïasoh ïa bun tylli ki tnat sorkar hapoh kajuh ka ïing ban pynkhlaiñ ïa ka jingïatreilang, ka jingtreikam kaba sted bad ka jingshakri kaba bha sha ki paidbah.
U Myntri Rangbah u la jurip ruh ïa ka Unity Mall, kaba dei ka projek kaba thmu ban ai ka jaka kaba kyrpang ïa ki nongthaw tiar, ki nongthaiñ jaiñ, ki nongsengkam lajong, ki Self Help Groups (SHGs) bad ki nongpynmih mar shnong ban pyni bad die ïa ki mar jong ki. Kane ka projek kan ïarap ban kyntiew ïa ki kam seng lajong, ban pynkhlaiñ ïa ka kam jngohkai pyrthei bad ban thaw lad kamai kaba neh.
Ha ka jingjurip ïa ka Sports Complex ha Umsawli, u Conrad u la ong ba ka sorkar ka dang ïai bteng ban tei ïa ki jingtei ïalehkai kiba katkum ka kyrdan pyrthei na ka bynta ki samla ka jylla. Kane ka complex kan ai ïa ki jaka pyntbit bad jingïalehkai kiba biang, ban pynroi ïa ki sap ïalehkai jong ki samla bad ban pynlong ïa ka Meghalaya kum ka jylla kaba paw ha ka liang jingïalehkai ha ka thaiñ.
U Myntri Rangbah u la ïoh ruh ka jingïathuh halor ka jingïaid shaphrang jong kiwei pat ki projek ha New Shillong Township. U la bthah ïa baroh ki agency kiba pyntrei ba kin ïatreilang jan, ban bud ryntih ïa ki jingïakhein bha ha ka jingtei, ban pynsted ïa ka kam bad ban bud ïa ki kyndon shngain bad ki por ba la buh.
Haba kren ha kane ka jingjurip, u Conrad u la ong ba kine ki projek ha New Shillong ki dei ki nongrim ban tei ïa ka lawei jong ka Meghalaya. U la ong ba ka jingbei tyngka ha ki jingtei sorkar, ki jingtei khaïi bad ki jingtei jingïalehkai kiba katkum ka juk thymmai kan ym tang ba kan pynbha ïa ka synshar paidbah bad ki jingshakri paidbah, hynrei kan thaw ruh ïa ki lad kamai, ki kam paidbah bad kan kyntiew ïa ka jingim jong ki paidbah ka jylla.
Ka Sorkar Meghalaya ka la pynskhem ba kan bteng ban trei shitom ban pyndep kloi ïa kine ki projek khnang ba ki paidbah kin ïoh jingmyntoi noh kloi na ki jingtei paidbah kiba thymmai, kiba treikam bha bad kiba neh slem.