Ki nongwankai ki dei ban ioh ïa ka jingshngaiñ haba ki wan sha Meghalaya : ong ka MTDF ha u CM

Shillong, Nailar 01 : Ki nongïalam jong ka Meghalaya Tourism Development Forum (MTDF) ha ka sngi Palei ki la kynduh ïa u Myntri Rangbah ka Jylla, Conrad K Sangma ban kyrpad ïa u ban shimkhia lang khnang ba ki paidbah ba wanjngohkai sha kane ka jylla kin don ha ka jingsngew shngaiñ.
Haba kren bad ki lad pathai khubor, u Bah Allan West Kharkongor u la ong, “Ka jingjia ba dang shen ha Umtyngar bad ruh ha Ri Bhoi ka la pynshep tieng ïa ki paidbah ban wan kai sha ka jylla. Kumta kadei ka kamram jong ka sorkar jylla ban pyntikna ba ki nongwan kai kin sngew shngaiñ haba ki rung ne ki leit kai kylleng ki bynta jong ka jylla.”
La ïathuh ruh ba ki la kyntu ruh ïa ka sorkar ba kan peit ba kin don ki bor pahara ne kita ki tourist police na ka bynta ki nongleit nongwan kiba leit sha ki thain Dawki, Sohra bad ruh sha ki thaiñ Amlarem.
Halor kane, u la ong ba u Myntri Rangbah u la pdiang ïa ka jingai jingmut jong ki bad ong ba kin sa bishar bniah halor kitei ki jingai jingmut ba kum ka synjuk ki ai.
Shuh shuh u ong ruh ba kum ki briew ba trei ha kam ba ïadei bad ki kam jngohkai pyrthei, ki shem ba dei tang ka jingpynneh ïa ka shongsuk shongsaiñ kaba lah ba kyntiew ïa ka kam jngohkai pyrthei ha ka jylla.
Da kaba pynpaw ïa ka jingïahap jingmut halor ka jingpynmih jong ka Meghalaya High Court haba ïadei bad ka kad liengsuin ha Umroi, u Bah Allan u la ong ba ki la ai jingmut ruh ïa ka sorkar jylla ba kan pynheh ïa katei ka kad liengsuiñ khnang ba ki liengsuiñ kiba kham heh kin lah ban hiar khyndew bad ba ki paidbah kiba wan sha kane ka jylla kin hiar beit ha Umroi khlem da donkam shuh ban hiar ha Assam kumba ki ju leh baroh shi katta.