Ki nongjngi na kane ka thaiñ kin hap trei shitom ban ïakhun bad kiwei: Thouba Singh

Shillong, Naiwieng 11: Napdeng ki heh ki haiñ ne ki nongpynïaid ïa ka North East Olympic Games (NEOG) kaba long ha Shillong, lehse Thouba Singh na Manipur, un dei uwei na kiba khampaw namar ba udei u nongïalehkai ba la mihkhmat ïa ka India ha Asian Games kaba la long ha Delhi ha ka snem 1982. Nangta ha Commonwealth Games ruh kumjuh. U Singh, u la long ruh u Junior bad Senior National Champion ha ka Swimming la bun bun snem bad bat ruh kum lahduh ha ka Asian Swimming Championship.
Hapdeng ka jingbunkam ban ïarap lang ïa ka Meghalaya Swimming Association (MSA) ha ka jingpynïaid ïa ka jingïakop ïa jngi jong ka NEOG, u Singh, u la pyllait por ban ïakren bad une u nongthoh khubor mynta ka sngi ha Crinoline Swimming Pool.
Mawphor: Naduh katno snem ka rta phi la pyrshang ne hikai ban jngi?
Thouba: Nga la pyrshang ne pyntbit ban jngi naduh ba nga dang 14 snem ka rta ha ki wah bad ha ki pung ne ki jaka jngi kiba don ha Shnong ha Manipur.
Mawphor: Kaei ka jingïohi jong phi ïa ka sap jngi ki Samla ka thaiñ shatei lammihngi?
Thouba: Ki don bun ki Samla kane ka thaiñ kiba nang ban jngi, tangba kiba lah ban ïashim bynta ha ki jingïakop pat ki dang duna. Mynta kiba khambun kidei na Assam bad kumjuh run na Manipur. Kiwei kiwei ki jylla te ki dang duna.
Mawphor: Kaei ka jingïapher ha ka jingïajngi ha ka por jong phi bad ha kine ki sngi ba mynta?
Thouba: Ohh… ka jingïapher te kaba la bun bha. Ha ka por jong ngi, ynda ladep jngi, ngi shu bam ki jingbam tei met kiba malu mala ne ki jingdih. Hynrei mynta te ki nongjngi ki la ïoh lut ki jingdonkam jong ka juk ba mynta,naduh ka rukom bam, ka rukom shah hikai, nangta ki tiar ki tar ba ki pyndonkam ruh ki la pher bak lybak na ka por jong ngi.
Mawphor: Lano tharai ki Samla kane ka thaiñ kin lah ban ïakhun bad kiwei pat ki Samla jong ka ri India?
Thouba: Ki Samla jong ngi ki don ka sap, hynrei ki donkam pat ki jaka ai jinghikai kiba biang bad ka rukom hikai kaba biang bha. Kumba long ka Assam ki Samla ki kiew namar ki don ka jaka ai jinghikai bad ki rukom hikai kiba biang kiba long katkum ka juk ba mynta. Te lada ki trei shitom ym don jingeh ba kin lah ban ïakhun bad kiwei pat ki nongjngi na kiwei pat ki bynta jong ka ri India.