Ki nonghikai kilong kum u thied bah ka akor ka burom bad ka jingnang jingstad, leh burom ka tnad pule puthi ha Ri-Bhoi

Nongpoh, Nailur 05: Ka ophis jong ka District School Education Officer bad Sub-Divisional School Education Officer mynta ka sngi hapdeng ka jingiphuh iphieng kila rakhe ïaka sngi burom ba 63 jong ki nonghikai (Teachers’ Day) kaba la pynlong ha Parish Hall Nongpoh ban ai ka jingïaroh ïaki nonghikai halor u synñiang u bynhei ba kila aiti met bad mynsiem ban kyntiew ïaka jingnang jingstad, kaba dei ruh ka sngikha jong u khraw pyrkhat ka Ri ba dei ruh u President ba ar jong ka Ri India u Dr. Sarvepalli Radhakrishnan.
Hakatei ka sngi la wan ruh ban shim bynta da u Bah Sosthenes Sohtun MLA ka Jirang kum u kongsan haka jingdonlang u Abhilash Baranwal Deputy Commissioner ka Ri-Bhoi, ka Ruby Z Das District School Education Officer, Ri-Bhoi District bad kiwei kiwei ki ophisar naka tnad pule puthi ka Ri-Bhoi ryngkat ki khynnah skul bad nonghikai.
Ha katei ka jingrakhe la sam ruh ïaki khusnam sha ki nonghikai haka district kiba la shah jied halor u synñiang ba kila noh sha ka pule ka puthi bad khamtam ban kyntiew ïaka jingnang jingstad ba kynthup ïa u Sukanta Bhattacharjee Assistant Teacher ka St. Michael’s Higher Secondary School Umsning haka Secondary Level, ka kong Ristrolian Nongrum Assistant Teacher ka Nehru Memorial Secondary School Umsning haka Upper Primary Level, ka Mary Magdalin Lamo Assistant Teacher ka St. Jude LP School Umpher Byrnihat, ka Varsha Sharma kum ka Best Lady Scout Master na Little Star Secondary School Baridua bad ka Manosha Kalwing kum ka Best Guide Captain na St Paul’s Higher Secondary School Nongpoh.
La pynphuh pynphieng ruh ha katei ka sngi da ki jingrwai, jingshad bad ki skit lyngkot bala shim bynta da ki khynnah skul naki skul bapher bapher kum ka dak ka jingburom ïaki nonghikai kiba la aiti met bad mynsiem ban phrang bad saiñdur ïaka lawei jong ki khynnah haka liang ka pule ka puthi, ka akor ka burom bad ban lam lynti ïaki sha ki kliar lum jong ka nam.
Haba kren ha katei ka sngi naka liang u Bah Sosthenes Sohtun MLA ka Jirang u la ong ba ki nonghikai ki dei ki thied bah jong ka jingnang jingstad, ka akor ka burom namar dei maki ba pynmih ïaki khraw pyrkhat haka pyrthei, bad ki riew stad bapher bapher lyngba ka jingprat lynti jong ki wat hapdeng shibun ki jingeh ki dieng pyngkiang ba ki mad ban saiñdur ïaka lawei jong uwei pa uwei u khynnah pule.
U la ai ruh ka jingïaroh ïaki nonghikai kiba la ioh pdiang ïaka National Award, State Award bad District Award halor ka jinglenlade jong ki ban aiti met bad mynsiem ban pynphriang ïaka jingnang ka jingstad kaba dei ka atiar ha kane ka juk ba mynta.
Namarkata u la kyntu ruh ïaki khynnah skul kiba don lang ha katei ka sngi ba kim dei ban pynlehnohei ïaka por hynrei ban minot thop haki jingpule jong ki, ban tip ïaka akor ka burom, ban long ki khynnah kiba tipsngi namar dei tang ki khynnah kiba minot bad kiba len lade ki ban poi sha kliar lum jong ka nam.