Shillong, Naiwieng 25: U MP ka Tura na ka liang pyrshah jong ka seng congress u Saleng A Sangma u la kyrpad ïa ki Myntri Rangbah bad ki MP jong ki 8 tylli ki jylla ka thaiñ shatei lammihngi ban ïatylli ban ïapynbeit ïa ki kynrum kynram kiba la mih hapoh ka skulbah NEHU bad ka jylla Manipur naba ka sorkar pdeng imat kam da sngap satia ïa ki jingeh bad ki jingim jong ki nongshong shnong kane ka thaiñ.
“Imat kim kheiñ snep shaphang ka jingim jong ki briew kiba sah ha kane ka thaiñ shatei lammihngi. Peit ïa ka jingjia ha jylla Manipur shibun ki nongshong shnong ki la ïap hynrei kim pynbeit ïa kane ka kam bad ka jingjia ha NEHU kim shim khia satia kumta ngi kyntu jur ïa ki MP jong ka NE ban ïatylli halor kine ki jingjia,” ong u Saleng.
U la ong, “Nga ngeit ba ka sorkar jylla bad ki Myntri Rangbah jong baroh ki jylla kane ka thaiñ shatei lammihngi bad ban ïasohlang kawei bad ban pynbeit ïa kine ki jinglong jingman naba ka sorkar pdeng kam shim khia ïa kine ki jingeh kiba la jia ha kine ki thaiñ. Ngi dei ban donlang barabor ha kino kino ki jingeh kiba mih ha kane ka thaiñ North East jong ngi.”
