Shillong, Nailar, 14: Ka National People’s Youth Front (NPYF), ka shnat treikam jong ki samla National People’s Party (NPP) kaba bat ïa u lakam synshar ha ka sngi Saitjaiñ ka la kynnoh ba ki MLA jong ka All India Trinamool Congress (AITC) kaba shong ha ka Liang Pyrshah jong ka Iingdorbar Thawaiñ ka Jylla kim nud saham ban kren ïa ka ishu ban dawa Inner Line Permit (ILP) ka dei namarba la bthah ïa ki ban ym kren ïa kane ka mat ïoh ka ktah kylla ïa ka Vote Bank jong ka party.
Haba pynkynmaw ïa ka jingïakhih ba dang shen jong ki 8 ngut ki MLA ka AITC ha New Delhi ban dawa ïa ka jingpyndam noh ïa ka Memorandum of Understanding (MoU) ïa pynbeit pud ba ladep ïasoi da ka Sorkar Meghalaya bad ka Sorkar Assam bad ban pynrung noh ïa ka ktien Khasi bad Garo ha ka Khyrnit Baphra jong ka Riti Synshar ka ri India, u National Working President jong ka NPYF u Bah Nicky Nongkhlaw u la buh jingkylli ïa ka AITC halor ka jingsngap mynthi ïa ka jingdawa ban pyntreikam ïa ka ILP, kaba long ka jingdawa kaba la slem jong ki nongshong shnong trai ri trai muluk ha kane ka jylla Meghalaya.
“Lehse kane ka lah ban long ba la bthah ïa ki (8 ngut ki MLA) ba kim dei ban ktah eiei halor kane ka sobjek kaba lah ban ktah kylla ïa ka Vote Bank jong ki. Kata ka lah ban long kaba kham kongsan namarba ba balei kim shym la rah ïa kane ka mat,” la kynthoh u Bah Nongkhlaw.
U la pynkynmaw ïa ki nongïalam ba hakhlieh duh jong ka AITC kiba la kyrshan ïa ka jingwan rung kyrthep jong ki mynder ri na ka ri Bangladesh.
“Ha u snem 2020, ka Mamata Banerjee ka la kren da kaba shai ba ki mynder ri na ka ri Bangladesh kiba la shong la sah ha West Bengal ki dei ki nong India. Ka jingkylli ïa u Mukul Sangma, balei u ai jingkyrshan ïa ka party kaba pdiang burom ïa ki mynder na ka ri Bangladesh,” la kynthoh une u nongïalam ka NPYF.
Haba pynpaw ba ka TMC ka la pyrshang borbah ban sait khuid ïa ka bamsap, ka thok ka shukor ïa ki paidbah, une u nongïalam jong ka NYPF u la ong ba kane ka party kam don satia ïa ka nongrim na ka daw ba ka la phiel ha baroh ki jylla ba ka la ïashim bynta ha ki elekshon. Ka la ïoh nod ha ka elekshon ha Goa namarba ki nongthep vote ki ladep ïohi ïa ki jingshukor jong ka.
Da kaba kynnoh ba ki nongïalam ka AITC ki dei kiba la dondak sniew ha ki kam bamsap bad ki kam shukor, u Bah Nongkhlaw u la ong ba u General Secretary ka ATIC uba dei ruh u khunruit jong ka Mamata Banerjee, u Abhishek Banerjee u don bynta ha Bengal Coal Scam ïa kaba ki ophisar jong ka Enforcement Directorate ki dang ïai bteng ban tohkit pyrshah ïa une u nongïalam bamsap. U Abhishek bad ka kurim jong u ruh ki la shah tohkit, u la ong.
Shuh shuh u la kynnoh, katba dang don ha ka Kynhun Myntri ka TMC u Partha Chatterjee u la lute palat T. 50 klur ka pisa u paidbah lyngba ka West Bengal School Service Commission (WBSSC) hynrei ka party ka shu sngap jar jar halor kane. Ki kam jong u, kiba la pynsniewdur ïa ka lawei jong ki khynnah skul bad ki nonghikai, ka pynpaw ba ka Party AITC ka long kaba kumno bad kaba shu leh eiei tang ynda la shah pynjah burom hakhmat ki paidbah.
U Bah Nongkhlaw u la kynnoh ruh ba u Anubrata Mondal u la ïoh jingkyrshan radbah na ki dkhot ka TMC wat hapdeng ka jingshah kem ha ka CBI ha ka kam khaii masi tuh ha ka 11 tarik mynta u bnai Nailar. U Mondal u dei uba ju donkam ban khaii tuh ïa ki masi sha khappud ka ri Bangladesh da kaba pynbam pisa ïa ki shipai BSF kiba ju peitngor ïa u pud u sam ha shilynter ka khappud. Ka long kaba sngew jah burom ban ïakren ïa kane, u la ong.
Ha u Naitung, 2022, u la ong ba ka Enforcement Directorate ka la pyntip ba ka jingdon jingem kaba T. 13.63 klur ka dei jong kawei ka kompeni kaba don bynta bad u nongïalam ka shnat treikam ki samla ka TMC u Vinay Mishra.
Ka CBI ka la rejistar ïa ka ejehar pyrshah ïa une u nongïalam ka TMC da kaba ong ba u Mishra u donkti ha kaba kam bamsap dewiong kaba dei bad ka par tih dewiong jong ka Coalfields Limited kaba don ha Kunustorïi bad ha ka thaiñ Kajora bad ha Asansol.
U la ong sa uwei pat u MLA bamsap jong ka TMC bad uba long ruh u President barim jong ka West Bengal Board of Secondary Education, u Manik Bhattacharya u la shah tohkit ha ka Enforcement Directorate ha kaba ïadei bad ka bamsap thungkam nonghikai SSC. Ïa une u ruh la khot hajir hadien ka jingshah kem jong u Partha Chatterjee.
Ïa mynta, u Bah Nongkhlaw u la ong ba ka TMC ka dei kaba pyrshah ïa ki nongrep bad kan long ka jingma kaba khraw ïa ka jylla Meghalaya kaba dang bun ki nongrep.
“Ngin pynkynmaw ïa ki paidbah ba ka Mamata Banerjee ka la pyrshah ïa ka Tata ha Singur, da kaba ong ba ki nongrep ki la duhei ïa la ka jong ka jaka bad ka shong ka sah. Ki la pyndonkam da kane ka buit tang ban ïoh jingmyntoi ha ka saiñpyrthei hynrei ynda la ïoh bat ïa ka bor synshar ha ka sien kaba ar, ka TMC kam shym la leh eiei ïa kito ki nongrep, kiba im khlem jaka haduh kine ki sngi,” u la ong
