Naiwieng 09: Ka campaign “Ki longkmie ïa ka Um, ka Um ïa ki longkmie”, ka sienjam jong ka Tnat Housing and Urban Affairs (MoHUA) ha ka jingiatreilang bad ka National Urban Livelihood Mission (NULM) bad ka Odisha Urban Academy, ka la kut ha ka jingjop ha ka sngi kaba lai jong ka, kata ha ka 9 tarik Naiwieng, 2023. Ka campaign kaba hap hapoh ka skhim Atal Mission for Rejuvenation and Urban Transformation (AMRUT), ka thmu ban kyntiew ka jingkynthup ia ki longkmie ha ki kam ba iadei bad ka um.
Kane ka campaign ka la saphriang kylleng ha kine ki lai sngi, bad la sakhi ka jingiashim bynta palat 14,000 ngut ki longkmie na ki bynta bapher bapher jong ka ri (lait noh ki jylla ba dang don hapdeng ka elekshon) kiba la iashim bynta shitrhem ha ka “Jal Diwali”. Ha kane ka campaign, kine ki la pynkup bor ia ki longkmie ban leit peit ia palat 530 tylli ki jaka pynkhuid um ba la tip kum ki Water Treatment Plants (WTP) ba don ha kylleng ka ri bad ki la ioh jingtip shaphang ki kam ban pynpoi ka umdih kaba khuid sha ki longiing.
Ki ophisar jong ki jylla ki la pdiang sngewbha ia ki SHG jong ki longkmie, bad ki la ban jur ia ka bynta ba kongsan ha ka jingjop jong kane ka campaign. La ai ia ki tiar, ba kynthup ki kot ai jingbatai, ki bilor um/ ki klat, ki pla bad ki badge sha baroh ki nongiashim bynta.
Ha baroh kane ka campaign, ki longkmie ki la ioh jinghikai shaphang ki jingdon jingem ba iadei bad ka um, ki la ioh jinghikai na ki riewshemphang halor ki kyndon ban test ia ka jinglong jong ka um, kaba pynpaw ia ka jingsngew long trai bad jingkitkhlieh ia ki jingdon jingem ba iadei bad ka um.Ki jingphaikhmat jong ka “Jal Diwali” ki kynthup ka jingai jinghikai ia ki longkmie shaphang ka skhim AMRUT bad ka jingseisoh jong ka ha kylleng.
