Ki khynnah, ki kmie ki kpa, ki nonghikai ki lah ban ïashim bynta ha ka Pariksha Pe Charcha

Shillong, Nohprah, 21: Ka 8th Edition jong ka Pariksha Pe Charcha 2025, kaba dei ka prokram kaba la sdang da u Myntri Rangbah duh ka ri u Narendra Modi ha kaba ïadei bad jingdonkam ban ïasyllok bad ki khynnah pule khnang ban pynduna ïa ka jingkhia jingmut ha ka por ba ki don hapdeng jong ki eksam.
Ka jylla kan ïasoh lang bad ka ri baroh kawei ha ka ban ïashim bynta lang ha kane ka 8th Edition jong ka Pariksha Pe Charcha (PPC) 2025, kaba dei ka jingsdang kaba kyrpang ha kaba ki samla pule, ki kmie ki kpa bad ki nonghikai kin ïoh ka lad ban ïakren bad ïasyllok bad u Myntri Rangbah duh ka ri u Narendra Modi. Ïa kane ka prokram yn pynlong ha town-hall format ha Bharat Mandapam, New Delhi, ha u Kyllalyngkot u snem 2025.
Mynta ha kane ka snem kaba phra, ka Pariksha Pe Charcha kan dei ka rynsan jong ka jingïakren kaba don jingmut kaba pynduna ïa ka jingsngewkhia jingmut ki samla pule ha ka por ba ki ïaleh ïa ki eksam. Ha ki snem ba la dep jong kane ka prokram, ki samla pule jong ka jylla Meghalaya ki la ïoh ka lad ban ïakren markhmat bad u Myntri Rangbah duh ka ri.
Lah ban kdew hangne ba ha u Kyllalyngkot jong u snem 2023, u samla Langsongding Khuptong, uba shong Class XII uba pule hapoh St. Edmund’s School, Shillong, bad u samla Owen Kharsawain, uba shong ha ka Class X uba pule ha Shullai Progressive School, Mawroh, Shillong, ki la ïoh ban mihkhmat napoh ka jylla.
Na ka bynta ka edition u snem 2025, ka jingïashim bynta lyngba ka online kaba dei ruh kum ka jingïakob ka long kaba laitluid na ka bynta ki samla pule, ki kmie ki kpa bad ki nonghikai. Kiba ïashim bynta ki dei ban jubab lyngba ki Multiple Choice Questions (MCQs) bad ki jingkylli ba la dep shna bad ban phah sha u Myntri Rangbah duh ka ri. Ka jingïakob ba la pynlong da ka NCERT, kan sdang naduh ka 14 tarik u Nohprah 2024 haduh ka 14 tarik u Kyllalyngkot 2025 hapoh ka official portal https: ii innovateindial.mygov.in.
Ki nongïashim bynta kiba lah ban leh ïa kane ki kynthup ïa ki khynnah pule jong ki klas ba 6 haduh ka klas kaba 12, ha ryngkatlang bad ki kmie ki kpa bad kumjuh ruh ki nonghikai.
La ong ba kane kadei ka kabu ksiar ïa ka jylla bad ïa ki skul kiba don hapoh ka jylla ba kin ïoh don bynta ha kane ka prokram kaba dei na ka bynta ka ri baroh kawei. “Ngi pynshlur ïa baroh ban ïashim bynta bad ba kin pynpaw ïa ki sur halor kane ka rynsan kaba kordor,” ong ka kyrwoh ba la phah da u I Tembe, (IAS) State Project Director, Samagra Shiksha & Director of School Education and Literacy Meghalaya, Shillong.