Shillong, Nailar, 16: U Myntri Rangbah ka Jylla ha ka sngi Balang u la ong ba ki kam ha ki tnat treikam jong ka Sorkar Jylla ki la duna bad ka Sorkar Jylla ka la buh thong ban plie lad ïa ki samla da kaba kin seng ïa ki kam lajong.
Haba kren ha ka Rozgar Mela ba la pynlong da ka NEHU, Shillong, u Myntri Rangbah u la ong ba ka Sorkar ka la thmu ban wanrah da kiwei ki lad ki lynti kiba lah ban ïakhun pyrshah ïa ka jingkyrduhkam ha ka jylla.
U la kubur ruh da kaba ong, ki kam sorkar ki la nang kyrduh, ki kam kiba lait kim palat 1200-1500 spah ha ka shi snem, ha ki tnat treikam bapher bapher.
U la ong ruh ba watla ka don ka jingïapher, hynrei ka jinglait jong ki kam ka neh beit kumba 1200 tylli ha ka shi snem.
Haba pynpaw ba ka donkam ïa ki samla ban don ïa ki sap trei bad ka jingtip ïa ki ktien ki thylliej bapher bapher, u Myntri Rangbah u la kren ruh halor ki lad ki kabu na ki samla ki ïohlad ban leit trei shabar ri, khamtam sha ki ri kum ka China, Japan, Germany, UK bad Australia.
Shuh shuh u la kdew ruh ba ka thong jong ka Sorkar ka long ban ai jingïarap ruh ha kaba nang ïa ki ktien bad ka sap treikam khnang ba kine kin ïarap ïa ki samla ha ka ïohkam ïohjam.
