Bah RM Shabong
Hadien ka jingïakhun ba tyngeh ban pyrshah ïa ka ktien Hindi, mynta ka la mih sa ka jingïakhun kaba kham tyngeh bad kata ka dei halor ka jingphiah ïa ki Constituency, ha kaba ha ka sien nyngkong ba ki nongïalam jong ki seng saiñ pyrthei bapher jong ki jylla ba shathie, ki ïa tylli lang kawei ban ïa pyneh hi triang halor ka jingthmu jong ka sorkar BJP, ban phiah Constituency na bynta ka elekshon Lok Sabha, ka ban sa long ha u snem 2029.
Da kaba klet noh ïa ka jingsngew parti jong ki, hynrei u MK Stalin, Myntri Rangbah ka jylla Tamil Nadu uba dei u nongïalam ka DMK, ula lum ïa ka jingïalang ha Chennai ha kaba la ïashim bynta lang da u Pinarayi Vijayan, Myntri Rangbah ka jylla Kerala, uba dei u nongïalam jong ka seng Communist bad nangta sa u Revanth Reddy Myntri Rangbah jong ka jylla Telangana uba dei na ka seng Congress bad nangta sa u Siddaramaiah, Myntri Rangbah ka jylla Karnataka uba dei na ka seng Congress, nangta u KT Rama Rao, uba dei u nongïalam jong ka seng Bharat Rashtra Samithi (BRS).
Kumba ka long mynta ki jylla ba shathie, ki don 129 tylli ki Constituency lane 23.8 percent, hynrei ha ka jingkhein kaba thymmai, la shim ba ki jylla ba shathie, kin ïoh sa tang 19.3 percent bad katei ka long, ynda haba yn pynbun ïa ki Constiuency, na ka 543ngut sha ka 800ngut ki dkhot sha ka dorbar Lok Sabha, katba ki jylla ba shathie kin ïoh tang kumba 145ngut ki MP bad ka Kerala, kaba la lah ban tehlakam ïa ka aiñ pynduna khun, kan dei ka jylla, kaba duhnong bha ha kane ka jingphiah Constituency kaba thymmai, ha kaba na ka 20 ngut ki dkhot, kan hiar sha ka 19 ngut.
Ki jylla ba shatei kin ïohnong ha kane ka jingphiah Constituency, ha kaba ka Uttar Pradesh, kan kiew na ka 80ngut sha ka 128 ngut ki MP, ka Bihar, kaba kiew bha ka jingbun briew jong ka bad ka jingïakha bun khun, kan kiew na ka 40 ngut sha ka 70 ngut, nangta ka Madhya Pradesh, na ka 29 ngut sha ka 47 ngut nalor kiwei pat ki jylla.
Na ka liang jong ki nongïalam na South India, ki don ïa ka mat, ha kaba ki pynsngew ba ka jingdon briew jong kitei ki jylla, ka long tang 19 percent, hynrei ka jingbei pisa jong ki sha ka sorkar India, ka poi sha ka 36 percent bad haba ka long kumta, ka dei ka bynta jong kitei ki jylla, ba kin kiew ka jingïoh bhah jongki ruh, ha kaba kin ïoh 36 percent ka jingdon ki nongmihkhmat bad kane ka dei ka mat kaba kongsan bha, ha kaba ka sorkar India, kan dei ban puson jylliew, la ka jingpynheh Constituency, kan shong ha ka jingbun briew (watla kiba bun kin shim ïa katei ka bynta), lane na ka jingdon jong ki kynhun niam, kaba lah ban long ba ki jaka ba ki don bun ki Hindu, kin ïoh kham bun ki Constituency, ki jaka ba kham bun ki Muslim, hangta kin ïoh duna bad ki jylla, kiba don shathie jong ka India, namar ba kim don bynta ha ki kam pynshitniam ne pynshit saiñ pyrthei, kumta kin ym ïohlad ban pynbun ïa ki nongmihkhmat jong ki lane ban ïoh tyngkhat ban synshar ïa ka India.
Halor kane ka mat, ka don ruh ka jingher ka hamsaïa hangne hangtai, ba ka Meghalaya kan don noh tang uwei u dkhot sha Lok Sabha, ha ka jaka arngut kaba ngi ju don haduh mynta bad ïa katei la shim jingkheiñ na ka jinghiar jong ka jingdon briew bad ba ki jingkheiñ, ki pyni, ba ka jingkha khun lane ka jingdon briew ha ka jylla, hapdeng u snem 1981 haduh u snem 1991 ka long 32.86%, katba ka nang hiar sha ka 30.65% hapdeng u snem 1991 haduh u snem 2001. Lada ka wan ha kane ka dur, ka lah ban thew ba ka sorkar India, kam kwah ban ai bhah kham bun ïa ki jylla, kiba duk lane ki bym lah ban kyrshan dalade hi bad kumjuh ki bym don ïa ka jingïajan bad ka jinglong jingman jong ki heh paid sha ri-thor, kumba ka long ka Meghalaya bad ha katei kajuh ka phormula, ka donkam ban ailad ïa ki jylla kiba riewspah, ba kin don shibun ki nongmihkhmat, namarba kitei kim donkam shuh ban dang leit rah bowl sha India, hynrei kin theh pynban puk puk ïa ka kamai kajih jong ki, ba ka India kan kyntiew ïa ka ïoh ka kot jong ki jylla kiba duk, kum ka Meghalaya ne kiwei ki jylla ba shatei jong ka India.
Kat haduh mynta ngim pat tip, ïa kaei ka ban jia ïa ka jingphiah Constituency sha ka thaiñ Shatei Lammihngi, namarba ki don ki jylla ki bym pat shym la pyndep ïa ka jingphiah Constituency kumba la shim jingkhein na ka jingdon briew ha u snem 2001 bad kitei ki jylla, ki kynthup ïa ka Arunachal Pradesh, ka Manipur bad ka Nagaland ruh kumjuh bad kane ka jingsahteng, ka la pynbitar ruh wat ïa ka Supreme Court jong ka India, ha kaba ka la buh por 3 bnai ïa ka Sorkar India ba kan pynïaid noh mar mar ïa kane ka kam.
Ka thaiñ Shatei Lammihngi ka don 25 ngut ki MP sha Lok Sabha, hynrei lada ka India ka ïaid da ka jingbun paid kumta katei ka jingphiah Constituency kan nang pynrit bad pynduna pynban ïa ki dkhot sha ka dorbar Lok Sabha na ka thaiñ Shatei Lammihngi hi baroh kawei.