K a jingroi stet jong ka jingnang jingstad ne kata ka Saïan & teknoloji ka la long kawei na ka phang kaba la pynshaiong ïa kiba bun ki riew rangbah, namar ba bun hi kim nang kumno ban pyndonkam ïa ka, hynrei katba ki khynnah kiba dang shu khie ki la don lypa ha ki ïa ka jinglah ban kin ktait ïa ki. Ki ong ba kane ka dei ka juk kompiwtor bad ki khynnah kiba la kha ha kine ki 10 snem tam mynta kim don jingeh ban pyndonkam ïa ki wat la kim shym la ïoh kano kano ka jinghikai katba kiba kito kiba la kham heh ki suhsat ban pyndonkam lada ym dei ba ki la ïoh jinghikai lypa. Ka jingroi jong ka jingstad ka la long kaba stet haduh katta katta katba ym don jaka satïa ban buh rieh ïa ka, namar ba kane ka pyrthei pynbna paidbah ne Medïa World kam lah ban set ïa kiwei kiei baroh hynrei kat kiba la pynmih thymmai la pyni paidbah beit lyngba ki Telibishon ne internet. Hynrei ka long pat kaba donkam ban phikir bha ha kaba ïadei bad ka jingailad ïa ki khynnah ba kim dei ban long laitlan than eh ha kaba pyndonkam ïa kine ki tïar jingstad namar ba ka lah ban ïalam sha ka jingbakla.
Ki jingsngewtynnad barabor ki pynlong ïa ki briew ban long kiba kyrni, kumta kano kano ka kam kaba ki briew ki sngewtynnad ki ïai bteng ban leh bad ïai leh ïa ka. Ka jingsngewtynnad barabor ka khring ïa ka jingmut jingpyrkhat jong baroh bad bun ki duh wat ïa ka bor sngewthuh ban don da u pud khnang ba kan ym ktah ïa ka jinglong shimet bad ka jingmlien briew. Ka jingkyrni palat ïa kano kano ka jingleh kaba ktah ïa ka ïa ka jingim ka long ka jingmlien kaba sniew. Kum ka nuksa yn ym don kiba nud ban len ba ka kyïad kam dei ka jingdih kaba bang, kumjuh ruh dei ka jingbang bad ka jingsngew tynnad jong ki briew ban dih ïa ka kaba la pynkylla long ïa ki ban kyrni ban dih ïa ka bad ha kaba kut ki hap ha ka jingduhnong kaba khraw namar jong ka jingmlien kaba sniew.
Kumjuh ruh ki tïar kane ka juk stad ne teknoloji ba mynta ki khring haduh katta katta ïa ki khynnah kiba dang khie dang san khamtam ki khynnah rit kiba dang leit skul. Hooid ym baroh ki khynnah ki long kumta namar ba kum ki briew ngi don la ki jong ki jong ki jinglong bad ki jingsngew tynnad, hynrei ym lah ban len ba kiba bun hi ki ïapbieit bha ïa ki tïar teknoloji ba mynta naduh ki TV, ki Mobile, ki Computer, ki Games ba lai phew jait. Ha kine ki sngi ym tang ki khynnah kiba kham bit khambïang kiba lah ban ktah bad pyndonkam ïa kine ki tïar khamtam lei ïa ki Mobile bad Kompiwtor hynrei wat kito ki khynnah surok ruh ki lapmiet bha ban ïaboi ha ki dukan ïalehkai kompiwter (Cyber Cafe) bad pynlut ïa ka por bad ka pisa ban ïalehkai namar ba ka don ka jingsngew tynnad, hynrei kane ka dei tang ka kam pynbyrngïa namar ba kim lah ban ïoh jinghikai ei ei ban pynmyntoi ïa ki lait noh na kaba shu
Ki khun ki kti jong ki briew kiba riewspah lei ki bïang lut ïa baroh ki jingdonkam bad ki khynah rit ha kine ki sngi ba mynta ki nang lut ban pyndonkam naduh ïa ki Mobile phone, Tablet, Kompiwtor bad kiwei pat. Ki don lei ki kmie ki kpa kiba ym ju kwah ban pynsngewsih ïa ki khun jong ki bad ki pynbïang lut wat ïa ki internet ba ki khun jong ki kin leh ïa ka internet ruh. Ha kine ki sngi ki khynnah kiba dang ha ka Klas IV-V ruh ki la nang bha ban pyndonkam ïa ka internet. Nalor jong ka jingdon jong ki Socïal Network kum ka Facebook, Twitter bad kiwei pat ki khynnah ki lah ruh ban pyndonkam ïa kiwei pat ki site kiba lah ban ïalam bakla bad pynthut ïa ka bor pyrkhat bad ka jabieng ba dang lung jong ki. Kawei na ki jingmih kaba ym sngewtynnad ka long ba ki khynnah ki ïoh jaka ban don paralok bad ruh wat bad ki briew ki bymithuh kiba lah ban shim kabu ïa ka jinglong lui lui jong ki. Kaei kaba la mih na ka jingkyrni palat jong ki khynnah ha ki Facebook bad kiwei pat ki site nalor ka jingkyrni ban ïalehkai Game ka long kaba ym lah ban pdïang, don bun ki khynnah kiba duh noh ïa ka bor ban durïap ha ka jingpule jong ki.
Kumta ki kmie ki kpa kiba don shisha ka jingsgewkhïa ïa la ki khun kim dei satïa ban ailad ïa ki khun jong ki ba kin kyrni palat ha kitei ki jingpynbyrngïa jong kane ka juk teknoloji. Ka Internet ka dei kawei ka bih bah kaba pynjot ïa ka bor pyrkhat ba dang lui lui jong ki khynnah. Ha ka Internet wat kiba bun ki samla bad ki rangbah briew ruh ki liem bad ka ktah haduh katta katta ïa ka jingim briew. Ka dei kaba shisha ba ka pynsuk haduh katta katta ïa ki briew ban iit ïa kino kino ki jingdonkam hok jong ki. Hynrei kumba ong ka Phawer u Aesop, “Ka don ka ma ha ba la than eh ka suk” Kumta ki kmie ki kpa ki donkam ban long kiba phikir bad husïar bha ban peit ba ki khun kin ym ngop ha ka jingkyrni.
