Ki jingkynnoh ka HNLC ki bym don Nongrim i kumba dei ka Buit Saiñpyrthei jongno re ban pynjah burom ïa nga : Dy CM

Shillong, Jymmang 11 : U Symbud Myntri Rangbah ka jylla uba dei peit ïa ka Tnad Urban Affairs U Ma Sniawbhalang Dhar ha ka sngi U Blei ula kyntait war ïa ka jingkynnoh ba dang shen jong ka seng Hynñiewtrep National Liberation Council (HNLC) ba u bei tyngka ïa ka Seng ha ka por ba u long Myntri hapoh ka Sorkar ba ïalam da ka Congress da kaba u la ong ruh i kumba ka dei tang ka “Buit Saiñpyrthei jongno re ” ban pynjah burom ne pynthohbria ïa u.
“Sngewsih, ba ngam shym la don ha Jylla la katto katne por namar nga leit jingleit shabar. Ka jingkynnoh jong ka HNLC ka dei kaba shu jler shu thok shu shukor bad ba khlem nongrim. Kumjuh ruh na ki jingkynthoh jong kiwei ki nongïalam seng saiñ pyrthei, la I pynban kumba ka dei tang ka buit Saiñpyrthei ne Politik tang ban pynthohbria bad pynjah burom ïa nga. Lada ka long kumba ki kynnoh balei kata ka seng ba shah ñiew beaiñ kam sei madan naduh kito ki por balei ka dang kynnoh haduh mynta? ” ong u Ma Sniawbha haba ïakren bad ki nongthoh khubor.
“Sngewbha kynmaw, katba ki dang kwah ban pynphriang khubor sniew ne ki khubor thok bad shukor pyrshah ïa nga katta U Blei un nang kyrkhu ïa nga, ïa ka party jong nga bad ïa ka Sorkar namar nga don hangne ban shakri naduh ka mynsiem ïa ki paidbah. Ngi don hangne ban ïada ïa ki paidbah, ka Jylla bad ka Ri baroh kawei. Ngi dei ki nongïalam jong phi, sngewbha shaniah ïa ngi namar baroh kine ki dei ki jingkynnoh ba khlem nongrim” ula bynrap.
Halor ka jingdawa ka Liang Pyrshah-ka Indian National Congress bad ka Voice of the People Party (VPP) ban weng noh ïa u na ka shuki DyCM ban plie lynti ïa ka jingtohkit halor kane ka jingkynnoh, u Ma Sniawbha ula ong ba um pdiang satia ïa kane ban hiar na ka shuki Symbud Myntri Rangbah ka Jylla namar ka jingkynnoh jong ka kynhun bala ñiew be-aiñ ka dei ka bym don nongrim.
“Kane ka dei ka jingdawa na ki seng saiñ pyrthei ba don ha ka Liang Pyrshah. Ka dei ka kamram jong ki ban dawa ïa ka jingiehnohkam bad weng ïa nga na ka shuki bad kiei kiei kiba phi leh ne dawa ki donkam ban don ïa ki sakhi sabut ba pura. Shu pyrkhat lada nga iehnohkam kan mut ba nga pdiang ïa ka jingkynnoh, ïa kaba ngam leh satia bad ngam khuslai eiei ruh em namar nga don hangne ban shakri ïa ki paidbah jong nga ym ban shakri ïa ki lehnoh, sngewbha kynmaw ïa kane. Kane ka dei ka jingkut jingmut jong nga. 17 snem kum u MLA hala ka jong ka Jylla. Nga ieid ïa ki briew lajong. Ngan aiti bad pyni nuksa ban nang trei shitom shuh shuh na ka bynta ki paidbah ka Jylla namar haba ieit jaidbynriew ka mut dei ban trei shitom na ka bynta jongki ban ïohi ïa ka bha ka miat ka roi ka par bad ka ïoh ka kot jongki ” ula bynrap.
Haba kylli la un shim ïa kano kano ka sienjam kat kum ka aiñ da kaba ujor ejahar, u Symbud Myntri Rangbah ula ong “Ngan sa peit namar haba pyrkhat, ngam tip mano ba don ha lyndet bad lehse lada nga lap ne tip mano ba don ha lyndet, nga lah ban hap leh ïa kata”.
“Ngin sa ïapeit ïa kaei kaba dei ban leh. Phi tip bha ba ka dei ka seng bala shah ñiew be-aiñ. Phi tip bha ïa ka jingpynphriang ïa ki khubor thok jongka manla ka por. Ngi hap ban peit bha la ka dei ka kam kaba khia ne em, ngin sa ïapeit hynrei ka dei ka jingkynnoh ba khlem nongrim bad baroh ki long kiba bakla” ula ong.
U la ong biang “ Kumba ka paw hi te ka dei ka buit saiñpyrthei jongno re da kaba ong ruh “ Ki jingkynthoh kiba mih na ki seng saiñ pyrthei ki paw shata. Ki don bun kiba kwah ban pynphriang khubor bakla shaphang jong nga hynrei ngam khuslai satia namar ka kamram jongnga ka long ban trei shuh shuh na ka bynta ki paidbah jongka jylla bad ban wanrah ïa ka roi ka par hapoh ka jylla sha jrong bad kham shajrong kata ka dei ka thong jongnga bad jongka sorkar hi baroh kawei”.