Ki jingkular ka sorkar ban siew tulop ïa ki nongtrei GHADC kam pat urlong: Bernard N. Marak

Shillong, Naiwieng 02: U MDC na ka party BJP na Tura Bernard N Marak ula pynpaw ïa ka jingbym sngewhun bad sngewtynnad halor ka jingbym pat lah ban pynurlong ïa ka jingkular jong u Myntri Rangbah ka Jylla bad ka Sub Committee ha kaba ïadei bad ka jingsiew tulop ïa ki nongtrei ka GHADC.
Katkum ka jingong u Bernard, u la pypaw ba ka jingkular ban siew ïa ka tulop ba shisnem hapoh u bnai Risaw bad ka jingsiew ïa ka tulop ba manla u bnai naduh u bnai Naiwieng, ka dang dei ka bym pat lah pynurlong haduh mynta.
Ha ka kyrwoh khubor u la ong, “Nga kyrpad ïa u Myntri Rangbah ba un bthah ïa u CEM ba un pyllait noh ïa ka tulop bad pynurlong ïa ki jingkular bad ban ai ïa ki jingmyntoi ba la kular sha baroh ki nongtrei khlem ka jingleh shiliang khmat. Ki MDC ruh ki dei ban ïoh lang kumjuh bad baroh ki jingmyntoi ki dei ban ai kumjuh namar kine ki jingmyntoi ki dei kum shi bynta jong ka jingsoi soskular ïasuk ba la ïasoi hapdeng ka ANVC bad ANVC-B”.
Une u MDC ula kynnoh ba ha ka jingtohkit la lap ba bun na ki nongtrei kim pat ïoh satia ïa ka tulop ba la kular, katba ka Executive Committee ka la pynkiew ïa ka allowance bad ki jingmyntoi ïalade.
U la kynnoh da kaba ong, “Ka Executive Committee ka la pynkiew ïa ka allowance bad ki jingmyntoi ïalade da kaba bynrap ïa ka allowance kali, orderly bad nongñiah kali casual, kaba la lam sha ka jingpynlut tam ba T.75,000 sha ka tulop jong ki, haba kyntait pat ban ai lang kumjuh ïa ki MDC ki bym don ha ka liang Synshar. Bun na ki Executive Member kim ju kham wan sha ophis hynrei ki leh smat bha haba ki pan ïa kine ki jingmyntoi.”