Ym lah ban len ka jingbeiñ jingkhoh bad jingkynnoh ïa kano kano ka party kaba ïalam ïa ka sorkar ka ju mih bad jia beit jan man ba kut ka san snem khamtam shwa ban leit sha ka election MLA kumba la jia ïa ka sorkar MUA II ba la lam khamt da ka Congress hapoh ka jingïalam jong u Dr Mukul Sangma ha u 2018 kumjuh ruh ka jia mynta ïa ka sorkar MDA ba la lam khmat da ka NPP hapoh ka jingïalam u Conrad K.Sangma.
Ha u snem 2018 kata ka jingkynnoh bamsap ïa ka sorkar MUA II ba la ïalam da u Dr Mukul Sangma ka la long shaba palat haduh ba la sngew ba uwei ruh u MLA jongka Congress un ym khie khlieh ne jop shuh. Hynrei haba la dep ka election bad dep niew vote jop bun pynban ka Congress hynrei tang namar ba ha Delhi don da ka BJP kumta la ïoh ban thaw sorkar da ka NPP ryngkat ka UDP, PDF, HSPDP bad BJP.
Kumjuh ruh ka long ïa kane ka sorkar MDA mynta la shah kynnoh shi rynjaiñ da ki jingbamsap ïa kaba kawei ruh ym pat don ba lah ban pynsabut. Nalor kata la sngew ba kine ki jingkynnoh kin ym kut katba ym pat kut ka election hynrei tang shu kut ka election lada jop bun lei lei ka NPP bad ka wan biang ha ka bor baroh kine ki jingkynnoh kin jah lut noh namar baroh baroh kwah ban ïa shong shuki lut.
Ym lah pat ban len wat la ki mih bun ki jingkynnoh hynrei kane ka sorkar MDA ka la leh hi la ka jong ka kam ban shakri ïaki paidbah. Mar ïa shimti la jia shwa ka jingïakhih pynkynriah ïaki Kharmetor na Them ïew Mawlong. Ka jingïakhih ka long kaba jur bad la ima shisha napdeng baroh ki jingïakhih namar i daw i long tang na ka jingshah shoh uwei u khynnah ha Them Metor sa mih ki kynrum kynram. La ïa dawa ba dei ban pynkynriah noh ïaki kharmetor bad ka sorkar MDA ka la shim khia, ka la daw ïaka High Level Committee hapoh ka jingïalam u Symbud Myntri Rangbah bah Prestone Tynsong bad kane ka Committee ka la ïa kynduh bunsien bad mynta ka la dep rai ban pynkynriah ïaki sha ka jaka ba don ka ophis Municipal shipor kaba dei ki quarter ba shna hi ïaki nongtrei Municipal. ïa ka Blueprint la aiti sha ki Kharmetor bad ki dei ma ki ki bym pat ai jubab haduh mynta ïa ka sorkar ba kane ka kam ka sa sahteng.
Nangta hadien mih sa ka jingïakhih pyrshah ïa ka Citizen Amendment Bill (CAB) kaba la long aiñ (Act) mynta hadien ba la mynjur da ka Parliament hapoh ka jingïalam ka BJP ïa ka sorkar NDA. Halor kane la mih ka jingdawa ban pynïoh ïa ka ILP bad ïa kane la wanrah ha ka dorbar ba kyrpang ha ka 19 tarik Nohprah 2019 bad la wanrah da ka Resolution hapoh ka ïing dorbar bad hadien ba la mynjur la leit ai ïa kane ka resolution sha ka sorkar pdeng ha u Amit Shah bad ha u Myntri Rangbah duh ka ri u Narendra Modi hynrei kane ka kam ka dang ïai sah teng mynta la jan saw snem ha kti ka sorkar NDA.
Jia sa ka jingshah pyniap u samla KSU ha kiwei ki jaidbynriew ha Ichamati kaba la pynkhluit tar ïa ki samla bad hadien ka jingonthang ïa u jia sa ka jingshah dung bun ki bar jylla hapoh Iewduh. Sdang shong syier biang ka suk ka saiñ. Nangta wan sa ka khlam COVID -19 ha shwa ban kut u 2019 bad bteng ha u 2020 haduh 2021 shiteng snem ei ei. Kumta kiba bun ki por kane ka sorkar MDA ka hap ban pynlut tang ha kaba tem ïaki jingkulmar bad khot ïakren ïaki seng bhalang bad bud sa ka jingpyrshang ban tehlakam bad ïakhun pyrshah ïa ka khlam. Wat la katta ruh hapdeng kine ki jingshah pynwit ka dang leh hi ïa ki kam ba dei ban leh.
ïa ka jingpynbeit pud kaba la sahteng la slem bah la 50 snem naduh ba ïoh ïa ka jylla Meghalaya ba pura, dei tad ha kane ka sorkar MDA kaba la nud ban shim ïa ka rai ban pynbeit ïa u pud u sam ha kaba ïa ka MOU jongka jingpynbeit pud la dep ïasoi ha nongbah Delhi hapdeng u Myntri Rangbah ka jylla u Conrad K Sangma bad u Myntri Rangbah ka Assam u Himanta Biswa Sarma ha ka jingïadon lang u Myntri Kam Pohïing ka ri u Amit Shah. Hooid halor kane ka kam ka ïing bishar ka hukum ban buhteng tad haduh u Rymphang mynta u snem ban ym pynïeng mawpud ei ei ruh em namar ka jingbishar ka dang ïaid shakhmat halor ka PIL ba la ujor da ka Synjuk ki Rangbah Shnong. Wat la katta ruh ka jingpynkhreh ban bteng ïa ka jingïakren pynbeit pud ha ka wat kaba ar ka la sdang hynrei ka thut noh namar ka jingsiat iap ki pulit Assam ïa ki 6 ngut ki mynsiem briew ha kaba san ngut ki dei ki nong Meghalaya ba sah ha Mukroh.
