Shillong, Nailur 28: Ka seng Hynñiewtrep National Youth Front(HNYF), East Khasi Hills ha ka sngi Balang ka la bteng biang ïa ka jingkhynra ïa ki licence ha ki thaiñ Mawprem, Garikhna bad Ïewduh bad ha kane ka jingkhynra jong ka seng ka la lap ba kiba bun hi ki dukan kiba ym don licence ki dei kiba la longtrai da ki bym dei ki Khasi. Ka seng hadien ba ka la lap ba kine ki dukan kim don satia ïa ki kot ki sla kiba biang ka la khang noh ban bthah ba kim dei ban plie katba kim pat lah ban pynbiang ïa ki kot ki sla.
Haba kren sha ki lad pathai khubor u bah Tyllibor Swer Assistance General Secretary u la ong ba kane ka jingïohlad khamtam eh kiba na kiwei ki jaidbynriew ban kamai spah khlem pynbiang ïa ki kot ki sla ka dei namar ka jingbym shimkhia ka tnad Taxation ban wan khynra wat hadien ba na ka laing ka seng ka la dep ai jigthoh halor kane la katto katne sien ban pyntip ïa kane. U la ong ruh ba kane ka jingbym shimkhia ka tnat ka pynlong ïa ka jylla ban duh ei da ki klur ka khajna na ka tim.
Shuh shuh u la ïathuh ba kane ka jingleit khynra jog ka seng ka dei kaba ka buddien biang ïa kaba ka la wan saw bnai eiei mynshuwa sha kine ki thaiñ bad u la ong ba kiba bun hi na ki dukan ba pynïaid da ki trai jylla ki la biang lut ïa ki kot ki sla ym kum ki dukan bar jylla kiba ym shym la pushe ban pynthymai ïa ki kot ki sla jong ki.
U la ong ruh ba ba ka sorkar lyngba ka tnat ba dei peit ïa kane ka kamka dei ban shimkhia ban budien khnang ba kine ki dukan kin pynthymmai ïa ki licence bad ba ka khajna ba ïoh lum na ki kan poi sha ka pla tyngka jong ka sorkar.
