Ki don haduh 85 tylli ki AC bill ba la kot T. 100.94 klur ba la dep sei, ong ka kaiphod CAG

Shillong, Lber 17: Ki la don kumba 85 tylli ki Abstract Contingent (AC) bill ba la kot T. 100.94 klur ba la sei haduh ka 29 tarik u Rymphang, 2024 ka dei ka detailed countersigned contingent (DCC) bill kaba dei kaba donkam ha ka Meghalaya Treasury Rules 1985, ïathuh ka kaiphod CAG halor ka finance account 2023-24.
Ka la ong ba ha ka snem 2023-24, 93 tylli ki AC bills ba la kot sha ka T. 67.58 klur la dep ban sei, ha kaba na kine, kumba 61 tylli ki AC bill ba la kot T. 64.89 klur (96.02 percent) la dep ban sei ha u bnai Lber 2024, kaba kynthup ïa ki artylli ki AC bill ba la kot T. 2.09 klur ba la sei na ka capital expenditure.
Ki DCC bill ha kaba ïadei bad ki 56 tylli ki AC bill ba la kot T. 75.07 klur kaba dei ban pynbiang ha ka 31 tarik u Lber, 2024 khlem pat ïohpdiang.
Ki don haduh 56 tylli ki unadjusted AC Bills ba la kot sha ka T. 75.07 klur kiba dei ban pynbiang haduh ka snem 2022-23, ki don haduh 36 tylli ki unadjusted AC bills ba la kot T. 73.81 klur bad 20 kiba dei ha ka jinglut kaba T. 1.26 klur ha u snem 2023-24.
Ka kaiphod CAG ka ong ba ka Financial rules (Rule 290 of Central Treasury Rules) ka ïathuh ba ym lah ban sei ka pisa napoh ka government treasury lada ym donkam ban sei ïa ka pisa mardor.
Ha ka jingdawa kaba kyrkieh, drawing and disbursing officers (DDOs) la ai bor ban sei ka pisa lyngba ka Abstract Contingent (AC) bills, ka la ong da kaba bynrap ba ki Rule 233 jong ka Meghalaya Treasury Rules 1985, ki DDOs ki donkam ban ai ki jingtip ba bniah halor ki detailed countersigned contingent (DCC) bills kiba donlang bad ki voucher ban kyrshan halor ka final expenditure kaba long hapoh ka bnai ba la sei ïa ka advance.