Ki don 30-40 ngut ki Pulit ba pahara ha Lapangap : Dy. CM
Jowai, Naitung 08: U Symbud Myntri Rangbah ka Sorkar Jylla Bah Sniawbhalang Dhar uba long ruh Chairman jong ka Regional Committee na ka bynta ka West Jaiñtia Hills u la pyntip ba la ar taïew tam ka Sorkar ka ladep buh 30-40 ngut ki Pulit ban pahara na ka bynta ka jingshngaiñ jong ki paidbah ha ka shnong Lapangap.
Ïa kane u la pyntip ha ka jingïakren bad ki lad pathai khubor ha ka sngi Balang ha ka jinghiar jurip ïa ka shnong Lapangap hadien ba la mih ka jingïakynad hapdeng ki Khasi Pnar kiba sah ha Lapangap bad ki Karbi kiba sah ha West Karbi Anglong District hadien ba la thang ïa ka ïing bad jynrat ïa ki tynrai dieng ba la thung da ka Karbi Anglong Autonomous Council (KAAC) ha u Lum Umchyrngan.
Ha kaba ïadei bad ka jingeh jong ki nongrep kiba leit sha ki jaka rep u Bah Dhar u la pyntip ha kine ki sngi ban wan kan sa don ka jingïakynduh lang hapdeng ki bor synshar ka West Jaiñtia Hills District bad ka West Karbi Anglong District ban ïa pynbeit ïa ki kynrum kynram, khnang ba ki nongrep kim dei ban shah ktah ha ka leit ka wan kumba ju long ha ki por ba mynshwa.
Halor ki kam pynroi ha ki jaka khappud, u la ong hadien ba la dep ka elekshon ha ka jylla Assam, ki Regional Committee jong ki ar tylli ki jylla kin sa shong pyrkhat biang ban pynbeit kloi ïa u pud u sam khnang ba ki kam pynroi kin poi beit beit sha ki thaiñ khappud.