K awei na ki daw ba ki seng saiñ hima lane ki seng politik ha kane ka jylla Meghalaya kim lah ban suhthied bad neh slem ka dei na ka daw ba kim burom markylliang ïa ki para nongïalam. Ha ka ri synshar paidbah wat la don nongïalam hynrei ka jingïatai, jingïamir jingmut ka dei ban don beit bad ha kata ka jingïatai baroh ki dei ban ïoh ban pyni ïa la ka nia. Ha kaba kut dei ban ïatai sani bad shim ïa ka rai kaba ïahun long bad kaba long ruh ka rai kaba bha tam na ka bynta ka seng- ym na ka bynta uno uno u nongialam shimet.
Ha kine ki khyndiat sngi ngi la lah ban ïohi bad ïohsngew shaphang ki kynrum kynram hapoh ka seng Voice of People Party (Ka Seng Kaba Long Ka Sur Jong U Paidbah) halor ka jingjied ïa ki kyrtong kiban sa ïaleh ïa ka elekshon sha ki District Council ha rilum Khasi bad Jaintia. Ka sur pyrshah kaba hakhmat eh ka wan na u MLA ka VPP na North Shillong – U Bahrit Adelbert Nongrum. U Bah Adelbert um hun satia ïa ka jingai tiket ïa u bah Strong Pillar Kharjana na ka Mawkhar-Pynthorumkhrah konstituwensi. Kawei na ki daw ka long lehse ba u khlem sah hapoh u pud u sam jongka Mawkhar Constituency namar u sah ha u pud u sam jongka Jaiaw Mawprem Constituency. Lehse na kane ka daw ba U Rangbah Adelbert u sngew khohnioh ïa kata ka jingai tiket hynrei kum u MLA jong kajuh ka konstituwensi lehse u kham tip kham bha. Nalor kata kawei na ki daw ba u pyrshah ka long ba khlem ia syllok bad iamir jngmut bad u shwa ban ai tiket hynrei la shu rai beit da ka State Election Committee ka VPP. Borabor ka ju don ruh ka jingïasngewthuh jingmut hapdeng u candidate MDC bad u MLA jong ka konstituwensi ba lada u candidate MDC u jop, un ïai kyrshan ïa u MLA ha ka election sha ka State Assembly. Bun ki MLA ki sngew pyrshah ban ïoh da u candidate uba khlaiñ namar u lah ban ïaleh sa ka elekshon sha ka dorbar thaw-aiñ bad pynrem kylla ia u MLA uba rim.
Ka jingsam tiket ha ka por elekshon kam long kaba suk bad kaba ïaid beit. Kin don hi ki kynrum kynram hapoh ki seng politik bad ngi la ju ïohi ba ki don ki candidate kiba ïaleh Independent (ïeng ha ka nongrim shimet) noh haba kim ïoh tiket na ka seng kaba ki kyrshan bad pan tiket. Kum kine kiei kiei ki ju jia hi ha ki seng saiñ hima bad kaba la jia ruh mynta ha ka VPP. Hynrei ka VPP naduh ba sdang ka kam ba ka long ka seng kaba kham pher na kiwei pat ki seng bad kam bud ïa kiei kiei kiba kiwei pat ki leh. Ka seng ka kam ba kan ïaleh pyrshah ïa ka bamsap bad ka thung kam ha barieh ïa kito kiba ithuh baheh bahaiñ lane kiba lah ban bei pisa (nepotism). Dei kine ki jingkular kiba la pynkyndeh khamtam eh ïa ki samla ba kin shu hala pyrta …Ha u Prah wat haba la kut ka elekshon ruh. Ka jingkular jong ka VPP ka long kaba dei eh namar kane ka jylla ka la bam kruiñ bad bampong da ka jingbamsap ha ki kyrdan bapher bapher jong ka synshar khadar bad khamtam eh ha ka thungkam thungjam lyngba ka Meghalaya Public Service Commission (MPSC). Ha ki por kiba mynshuwa don bun kiba la shah thung kam namar ki don ka jingïadei bad ki minister lane bad ki ophisar heh kyrdan. Kane ka pyndum bad pynduh mynsiem ïa ki samla wad kam kiba la pynkhreh hok na ka bynta ki eksamin thung kam hynrei ym poi shaei shaei ruh.
Related Posts
Peit ia ka jingpynlut ka District Council ha ki lum Khasi ha ka ban thaw ïa ki ïing har rukom kum kato ka resort ha Umiam kaba ïaid na lynti rim bad kaba shu sah khongreng, nangta sa kato ka ïing ha Wah U Tim hajan Mawmluh kaba la plie naduh u bnai Naiwieng jong u snem 2023 bad haduh mynta ruh lah shu ieh khang tala sah namar ym pat don ba ai reng ban sdang kata ka jaka bam (restaurant) shato. Kine baroh ki jingtei ki long tang namar ba don katto katne ki MDC kiba trei kontrak artad bad dei kane kaba pynjot ïa ka synshar khadar ha kane ka jylla.
Ha ka sorkar jylla ruh ki myntri sorkar kiba ngi khot ki “high level” lane ki heh kyrdan ki pyntrei ïa ki kam kontrak kiba heh ba heh bad dei na kane ka daw ba ki surok bah bad surok rit baroh ki jot ki pei haduh katne. Ka seng VPP kam shym ong eiei halor kane ka phang ba yn ym shah ïa ki MLA bad MDC na ka seng ba kin trei kontrok de. Ha ka ktien phareng ïa kum kane ki khot ka “conflict of interest,” lane ka jingïatyngkhuh hapdeng ka kam paidbah bad ka kam shimet. Ki minister kiba trei ruh ïa ka kam kontrak ki pyndonkam ïa ka pisa paidbah kum ka pisa lajong. Dei kane kaba long ka jingtim ïangi ki nongshong shnong ka jylla Meghalaya. Kyrmen ba ka VPP kan shim khia ïa kane ka phang kaba kongsan haduh katta katta.
Kane ka jingkynrum kynram hapoh ka seng VPP halor ka jingai tiket ban ïaleh MDC ba khlem da ïa don ka jingsngewthuh para dkhot rangbah ha ka seng ka lah ban wanrah ïa ka jingtroiñ ka seng. Kyrmen ba kan ym long kumta tangba ki nuksa kiba mynshuwa ki kdew ïa ka jingma haba ki nongïalam ka seng kim sngap shuh ïa ki dkhot ka seng kiba la ïeng skhem ha ka nongrim kaba ka VPP hi ka la pynphalang.
Lada ka seng VPP ka lah ban pynïaid beit shuwa tang ïa ka District Council ruh lehse ngin lah ban khmih lynti ba ka jingkylla kan wan ha u snem 2028. Hynrei lada lah sdang ka jingïakynad kumne mynta te imat lah shitom ban poi sha kata ka thong.