Ki bymtip ïa ka khana pateng kin ym lah hi ruh ban thaw ïa ka khana ne histori, ong u Lat

Shillong, Nohprah 18: U Lat ka jylla u C H Vijayashankar u la ong ba kino kino ki bym tip ïa ka khana pateng kin ym lah hi ruh ban thaw ïa ka khana pateng.
Ïa kane u Lat ka jylla u la ong ha ka sngi rakhe lyngkhuh sngi khlad ba 85 snem jong u Myllung Soso Tham kaba la rakhe ha ka sngi palei ha U Soso Tham Auditorium Shillong ba la pynlong da ka tnat Arts and Culture jong ka sorkar jylla ha ka jingïadonlang u Myntri ka tnat u Bah Sanbor Shullai, u Principal Secretary u Bah F R Kharkongor, ka Director ka Kong Aidashisha Majaw bad kiwei kiwei.
Ha kane ka jingrakhe u Lat ka jylla u la kyntu ruh ïa ka tnat ba ha ka jaka ban rakhe ïa ka lyngkhuh sngi khlad noh une u nongthoh poitri manla ka snem, dei ban pynkylla noh da kaba rakhe kyrpang ruh ïa ka sngi kha jong u ka ban long ka jingmyntoi ïa ki khynnah pule.
U la ong ruh ba ki jingnoh synniang jong ki longshwa manshwa bad ki kpa tymmen sha ka imlang sahlang ka dei ban ktik ïa kane ka pateng ban bud ban synniang lem ïa ka imlang sahlang bad ban kylli ruh ïalade kaei ka bynta kaba don ban leh eiei na ka bynta ka imlang sahlang.
“Nga la shim bynta ruh ha u snem ba la dep ha kane kajuh ka prokram bad nga sngewthuh ba kan long ka jingmyntoi kaba khraw bha ïa ka imlang sahlang baroh kawei. Kawei nga kwah ban ong ba ha ka kyrteng jong u Myllung Soso Tham bad ka ïing ka sem jong u, ngi dei ban pynlong ki prokram bapher bapher ha kine ki 12 bnai kum ki prokram jingtem, ka football, ban thaw ïa ka Academy khnang ban lah pynsah nam ïa une u Myllung,” ong u Lat ka jylla.
U la ong ba ha ka jaka ban pynlong ïa ka jingrakhe sngi khlad dei ban pynlong ki jingrakhe kiba bha ki ban pynriewspah ïa ka imlang sahlang, ka kolshor, ka jingrakhe sngi kha kaba donkam ban kynmaw.
“Ïa u Soso Tham la kynmaw kum u kpa jong ka thoh ka tar jong ki Khasi bad lyngba ki jingthoh jong u kin long ki jingmyntoi ïa ka pateng ban wan. Dei ban burom ïa ka ktien la jong bad ka jinghiar pateng, bad na ka liang ka Raj Bhavan kan kyrshan ïa baroh ki jingpyrshang jong ka tnat bad ngan sa kren bad ka sorkar pdeng bad ki ophisar ka sorkar pdeng ban ïarap lem ïa ki jingdonkam jong ka tnat,” ong u Lat.
La ïoh ka jingkren na u Myntri ka tnat u Bah Sanbor Shullai, la pdiang sngewbha da u Principal Secretary u Bah F R Kharkongor uba la pynpaw ba u Myllung Soso Tham um dei tang u nongthoh poitri hynrei uba ïohi jngai ban pynkylla ïa ki kyntien kren sha ka thoh ka tar da kaba pynthikna ban pynneh pynsah ïa ki pateng ban wan.
U la pynpaw ruh halor ka Chief Minister’s Research Grants kaba T. 3 lak, ha kaba 48 ngut ki khynnah ki la shah jied mynshem snem ban bteng ïa ki jingpule halor ka phang ka khyndew ka shyiap, ka ktien bad ka kur ka jait.
La ïoh ka jingrwai pdiang na ka Fidelity, ka khynnah skul ka Memorial Senior Secondary School, nangta ka jingshad classical na ka Notun Ashar Vani.
La sam ïa ki khusnam sha ki nongjop ha ki jingïakob bapher bapher kaba la pynlong ha ka 15 bad 16 tarik une u bnai, kynthup ka thoh poetry bad recitation, ka quiz, singing bad ka art competition, ba la pynlong da ka Sohra Government College.
Ki khynnah skul bna ka skul St. Dominic’s Savion HS School bad Auxilium Higher Secondary School ki la ïoh ki khusnam. Ha kane ka sngi na ka liang jong u Lat ka jylla bad u Myntri ka tnat u Bah Sanbor Shullai ki la pynkup burom ïa kiba haïing ha sem jong u (L) Babu Soso Tham kiba wan ïashim bynta lang ha kane ka prokram rakhe lyngkhuh sngi khlad jong u Babu Soso Tham.