Ki bym dei ki Khasi ruh ki lah ban thep vote ha elekshon MDC-Dei ban tuklar mardor: KHNAM
![](https://mawphor.com/wp-content/uploads/2024/01/KHNAM-flag.jpg)
Shillong, K’Lyngkot 11 : Ka Khun Hynniewtrep National Awakening Movement (KHNAM) ka la pynsngew ha ka u CEM ka KHADC, u Bah Pynïaid Sing Syiem ïa ka jingdonkam ban pynkylla noh lane amend ïa ka 128 AD Rule.
Haba kren bad ki lad pathai khubor hadien ka jingkynduh ïa u CEM, u Working President ka KHNAM, Bah Thomas Passah u la ïathuh ba naduh u snem 2016 ka seng ka la buh ïa kane ka jingdawa, na ka bynta ban pynskhem noh da kaba shai ba tang ki Khasi kiba lah ban jied lane shim bynta ha ka election MDC.
“Katkum ka aiñ kaba don mynta, na ka bynta ban jied ïa ki nongmihkhmat sha ki District Council donkam ban dei u nongshong shnong ba pura ka India, bad uba la palat ïa ka 18 snem shaneng, uba biang ka rukom pyrkhat bad u bym don dak sniew. Kane kamut ba u bym dei Khasi uba dei u nongshong shnong ba pura u lah ban thep vote,” u la ong.
Shuh shuh u la bynrap da kaba ong ba kane ka aiñ ka kdew ruh ba uno uno u briew uba la shong la sah palat 12 snem u la dei u nongshong shnong ba pura jong ka jylla.
“Kumta halor kine ki nongrim, ka KHNAM ka la ai jingmut ïa u CEM ba dei ban pynkylla noh ïa kane bad ban buh pat ïa ka kyntien kaba shai ba tang kiba dei ki Khasi kiba lah ban thep vote bad don bynta ha ka election MDC.
La ïathuh ruh ba ha ka jingïakren kaba bniah, na ka liang u CEM u la kular ban shimkhia ïa ka kam bad kyntu ruh ïa ki nongïalam ka KHNAM ban pynsngew ïa kane ka mat bad u Myntri ka tnad District Council Affairs ka sorkar jylla.