Ki arngut ki MLA ka NPP kiba phet seng dei kiba la duh tiket lypa, sa uwei un phet

Shillong, Naiwieng 29 : Ki arngut ki MLA ka NPP kiba la hiar shuki bad phet ruh sha ka BJP kata u Benedic R Marak na Raksamgre Constituency bad ka Ferlin C.A Sangma na Selsella Constituency ki dei kiba la tip lypa ba kin ym ïoh tiket shuh na ka NPP ban ïakhun ïa kane ka election MLA 2023 bad yn dang don sa uwei u ban phet na kane ka party bad une ruh uba la tip ba un ym ïoh tiket shuh kata u S.G Esmatur Mominin jongka Phulbari Constituency ïathuh ki nongïalam jongka NPP haba iakren bad u nongthoh khubor.
Ka daw ba kin ym ïoh tiket shuh na ka NPP namar ki nongïalam ka Party ki la dep swar jingmut bad ki la swait bha bad ki lap ba kine baroh kin ym wanphai ne jop shuh ha kane ka election 2023 namar ka lyer jong ki ka hiar palat.
Ha ka jaka jong u Mominin ka NPP ka la pynkhreh ban ai tiket noh ïa u A.T Mondal. Namar une ruh u la ai ïa ka shithi jongu sha u President ka Congress u ma Vincent H Pala mynta hi ka sngi ban pyntip ba un ym don shuh hapoh ka party bad un mih noh na ka Congress.
Ha ka shithi ba u A.T Mondal u la phah sha u President u la pynpaw “ Nga kwah ban pyntip sha phi ba nga la ïehnoh ïa ka jinglong dkhot jong nga ha ka Congress bad kumta ngan ym ïadon bynta ei ei shuh bad kino kino ki kam kiba nga bat ha ka Congress bad nga kyrpad ba phin sngewbha ban pdiang ïa kane”.
Halor ka jingpynïasoh bad ka NPP un sa ïa pynbeit bad ki nongbud jong u ha ka jingïakynduh bad ki ha ka taiew ba nyngkong u Nohprah. Namar ba u Esmatur u la tip ba un ym ïoh tiket shuh na ka NPP da kane ka jingpynkhreh wan pynïasoh noh u Mondal kumta une ruh u la rai ban pynïasoh noh bad ka BJP ban ïakhun ïa ka election 2023.
Kumjuh ruh la ïathuh da ki nongïalam ka NPP ba ha Selsella bad ha Raksamgre Constituency ruh ka NPP ka la dep don lypa ki kyrtong kiba ka party ka la dep jied lypa ban ai tiket na ka bynta kane ka election MLA 2023.
Na ka liang u National President ka NPP uba dei ruh u Myntri Rangbah ka jylla u Conrad K Sangma u la ong ba ka party ka la pynkhreh bha na ka bynta ka election 2023. Halor ka jingphet kine ki arngut na ka NPP u Conrad um treh ban ai kano kano ka jingkynthoh hynrei ula ong ïa ki nongthoh khubor ban kylli hi na ki balei ki phet na ka NPP. Kiba kum kine ki jingïaphet seng ne party ki jia hi ha man la kawei pa kawei ka party shwa ka election.
U shu kyrkhu kyrdoh ïa ki la kin ïakhun na kano kano ka seng saiñ pyrthei ruh. “ Hynrei na ka liang jong ngi ngi la long kiba la pynkhreh bha na ka bynta ka election” ong biang u Myntri Rangbah.