Bthah ka NHRC ïa u Home Secretary bad u CS Assam ban shimkhia halor ka jingjia ha Mukroh
Shillong, Naiwieng, 29: Ka National Human Rights Commission (NHRC) ha ka sngi Baar ka la Tuesday ka la shimkhia ïa ka jingjia ha ka shong Mukroh bad bthah ïa u Union Home Secretary bad ïa u Chief Secretary jong ka Jylla Assam ban ai jingmut kumno ban khanglad noh ïa ki jingjia ha ki jaka ba don ka jingïakajia pud hapdeng ka jylla Meghalaya bad Assam.
Kane ka la mih hadien ba ka Sorkar Meghalaya dang shen ka la aiti da ka dorkhas ha ka NHRC ba kan tuklar ïa ka jingshah siat ïap jong ki hynriew ngut ki briew ba kynthup ïa san ngut ki Pnar bad uwei u nongap pahara khlaw ka Sorkar Assam ha ka jingsynreit kuli da ki Pulit Assam bad ki nongap pahara khlaw ha ka shnong Mukroh, West Jaiñtia Hills District ha ka 22 tarik u Naiwieng.
Ka NHRC ha u kyrwoh ka la ong ba ka Commission ka la shim ba kane ka jingjia ka dei na ka daw ka jingïakajia pud hapdeng ka jylla Assam bad ka jyla Meghalaya, kaba la sah pongding da ki snem.
“Jin lada ïa kane ka jingïakynad yn lah ban ïapynbeit noh, kum kine ki jingjia kin ym wan jia. Watla ka lah ban dei ka jingïakajia hapdeng ki ar tylli ki jyll, ki Pulit ki dei ban kham tyngkan na kaba pyndonkam palat pud ïa ka bor. Namarkata, donkam ban da bishar bnai ïa ki SOP ba treikam, lada don, halor ka jingsiat kuli da ki bor shipai/pulit ha ki jaka ba don ka jingïakajia pud hapdeng ki ar tylli ki jylla,” la ong ka NHRC.
Namarkata, ka Commission ka la phah ïa ka dorkhas sha u Home Secretary jong ka Sorkar Pdeng bad sha u Chief Secretary ka Sorkar Assam. “Ki dei ban shong bishar bad sei ïa ki lad ki lynti kumno ban ai jingmut na ka bynta ban khanglad ïa kum kine ki jingjia, khamtam ha ki jaka kiba don hapdeng ki jingïakajia pud. La khmih lynti ba kin ai jubab hapoh artaïew” ong ka NHRC.
U kyrwoh u ong, ba ka jingkynnoh ka mih ba ki Pulit ka Assam bad ki Forest Guard ki la kthong ïa kawei ka trok kaba kit dieng bad ïa kane ka trok la ïoh ban bat ha shnong Mukroh da kine ki bor ka aiñ.
Ki nongshong shnong ka Mukroh ki la khie bitar halor ka jingwan rung ki Pulit ka Assam ha ka shnong jong ki. Ki la kerkut ïa ki Pulit ka Assam bad Forest Guard, kaba lam sha ka jingther kuli.
Ha kane ka jingjia, saw ngut kila ïap hashen katba saw ngut na ki nongshongshnong ki la mynsaw jur bad la pynkit sha hospital. Na kine, arngut ki la khladnoh ha hospital.