Khyrwit ka erïong bad leilieh ha Bihar, ïap palat 60 ngut tang ha ki 72 kynta

Patna, Ïaiong 12 : Ki la don palat 60 ngut ki briew kiba la duh ei ka jingim tang ha kine ki 72 kynta na ka jingwan ka eriong kaba jur ryngkat u lapbah bad ka leilieh ha ki katto katne tylli ki distrik jong ka Bihar.
Halor kane, na ka liang u Myntri ka Sorkar Pdeng, u Chirag Paswan ha ka sngi Saitjain u la kyntu ïa ka sorkar Bihar ba kadei ban pynbna noh ba ka la dei ka nem sniew ïa ka rep ka riang namar katei ka jingwan kynsan ki bor ka mariang khlem pat dei por ka la kylla long pynban ka nemsniew ba shyrkhei.
Shuh shuh u ong ruh ba donkam ruh ban siew ïa ka bai luksan kaba biang sha ki nongrep kiba shah ktah ha kane ka bor mariang ha kylleng ki bynta jong ka distrik.
Ha ka shithi sha u Myntri Rangbah jong ka Bihar, u Nitish Kumar, na ka liang u Chirag Pawan u la ong, “Ka jingwan khlem pat dei por jong u slap bad ka eriong ha kine ki arsngi lai sngi ka la ktah jur bad wanrah ruh ka jingjulor kaba shyrkhei bha ïa u kba bad kiwei ki mar rep ha kylleng ki distrik jong ka jylla, kaba la buh mynta ïa ki nongrep ha ka khim khait kumno ban leh. Ïa kane ka jingjia dei ban pynbna noh ba kadei ka nemsniew (state disaster) bad donkam ruh ban leh ia ka sorbe khnang ban lah ban antad ia ka jingjulor bad ka jingduh jong ki nongrep.”
U banjur ruh ba ki nongrep kiba shah ktah ia kine ki jingduh ki dei ban ïoh ïa ka bai luksan kaba biang.
Katkum ki khubor la antad ba ka jingïap jong ki briew ha kane ka jingwan kynsan ki bor ka mariang ka la nangkiew ha kylleng ki bynta jong ka jylla.
Tang ha Nalanda District ka jingdon ki briew kiba duhei ïa ka jingim ka la kot sha ka 23 ngut tad haduh mynta nalor ka jingduh kaba shyrkhei ïa ki mar rep.
Ha kawei pat ka liang, u Paswan u la kyntu ruh ïa ka sorkar ba ka dei ban pynbiang ruh ïa ki dawai pynïap khniang sha ki nongrep ha ka dor kaba duna nalor ban buh ruh ïa ki jaka sah shipor na ka bynta ki nongrep kiba shah ktah.
Na ka liang ka sorkar Bihar ha kane ka sngi Saitjain ka la bthah ruh ïa ki ophisar ba kin leit ban sorbe bad antad ïa ka jingduh kaba ki nongrep ki mad ha kane ka jingjia.