ïaïong, 19: Ka Russia mynta ka sngi, ka la khyrwit biang bad kham tyngeh ïa ka Ukraine da ka jingthmu ban pyllait luid ïa ki artylli ki jylla kiba don ha Ukraine, kata ka Donetsk bad ka Luhansk.
Ka Russia ka la kam ba ka la ther ïa palat 1200 tylli jaka jong ka Ukraine ba ka la ai por ar kynta a ki Shipai Ukraine ba kin pyndem ne mad ïa ka jingïap ha Mariupol.
Lah ban kdew hangne ba ka Russia ka la hiar thma ïa ka Ukraine ha ka 24 tarik u Rymphang mynta ka snem ha kaba ki shipai ryngkat ki tup ki man ki la poi haduh ka nongbah Kyiv. Hynrei namar ka jingïeng satar ki shipai bad ki paidbah ka Ukraine bad ka jingïakren ïapynbeit hapdeng kine ki artylli ki ri, ka Russia ka la mih noh na Kyiv bad kiwei kiwei de ki nongbah.
Pynban ka Russia ka la phai khmat noh sha kitei ki artylli ki jaka kiba don ha syndah bad ka da ka jingthmu ban pyllait noh ïa ki na ka jingsynshar ka Ukraine. Ka Russia ka kam ba kine ki artylli ki jaka kiba bun kiba shong ba sah kidei ki nong Russia.
Ki shipai Russia ki la kerkut ïa kawei ka karkhana ha Azovstal steel mill ha Mariupol bad ai por ïa ki ar kynta ba kidei ban pyndem noh ne ban shah ïa ka jingïap kaba shyrkhei.
Kane ka karkhana kaba don ha ka jaka ba heh kumba 11 Square KM, kadei ka bynta kaba khatduh eh ha Mariupol ban ïada na ka jingshah jop ha ki shipai Russia.
Na ka liang ka Ukraine, ka la kam ba ha ka bynta kaba shapoh jong kane karkhana ne ka under ground, la shong rieh palat shi hajar ngut ki paidbah, hynrei ka Russia ka la ther beit da ki bom.
