Khynwin ka Parliament namar ka jingjia ha Manipur,hap pynsangeh ïa ka dorbar

New Delhi, Naitung 20: Baroh artylli ki ïingdorbar Parliament, kata ka Lok Sabha bad ka Rajya Sabha, ki la khynwin puk mynta ka sngi halor ka jingjia ha Manipur, khamtam lei lei halor ka video kaba la saphriang mynta ka sngi halor ka jingshah pynïaid lyngkhuit ki arngut ki kynthei ha ki rangbah. Kane kadei ka jingjia kaba la jia ha ka 4 tarik u Jymmang mynta ka snem, kata shi sngi hadien ba la bthei ka jingïakulmar ha Manipur hapdeng ki Kuki bad ki Meitei.
Mar synsdang ka ïingdorbar, ki dkhot ka liang pyrshah ki la ïeng ban pyrta “Manipur.. Manipur.. ka ding ha Manipur ka klang, balei u Myntri Rangbah Duh u sngap jar jar”.
Nyngkong ka jingïahylla, ka jingïapyrta ka la sdang ha Lok Sabha bad bud sa ka Rajya Sabha bad ki liang pyshah kim shym la ailad ïa u Shongknor ban pynïaid ïa kiwei kiwei ki kam ba la buh hakhmat ka ïingdorbar.
U Nongïalam ka Liang Pyrshah ha Rajya Sabha, u Mallikarjun Kharge, u la ong ba ki kynthei ha Manipur ki shah batbor, ki shah pynïaid lyngkhuit bad ki briew ki shah pynïap, balei u Myntri Rangbah, u Narendra Modi u sngap jar jar.
Hapdeng ka jingïahylla, ka jingïapyrta haduh ba ym sngewthuh sngewthaw shuh, u Myntri ka tnad Parliamentary Affairs, u Pralhad Joshi, u la ong ba ka sorkar ka long kaba kloi ban ïakren ïa kane ka jingjia ha Manipur, la ka long ha Lok Sabha ne ha Rajya Sabha. U Joshi u la ong ruh ba ka jingjia ha Manipur kadei kaba ktah bha ïa ka jaidbynriew bad u Myntri korbar ri un sa ai ka jubab kaba shai bha halor kane. U la kyntu ruh ïa ki Liang Pyrshah ba kin ailad ïa u Shongknor ba un buh ïa ka tarik ban ïakren ïa kane ka kam.
Hynrei ki Liang Pyrshah kim shym la sngap bad ki la bteng ban pynthut ïa ka jingïashong dorbar kaba la pynlong ïa ki Shongknor ha baroh artylli ki ïingdorbar ban pynsangeh noh shuwa ïa ka jingïashong dorbar na ka bynta mynta ka sngi, kaba long ka sngi ba sdang jong ka dorbar lyiur.
Lah ban kdew hangne ba ha kine ki sngi kiba ladep, kane ka video kaba la ring ha ka 4 tarik u Jymmang mynta ka snem halor ka jingshah pynïaid lyngkhuit ki arngut ki kynthei, ka la saphriang bad tang hapdeng khyndiat por, ka la wanrah ka jingbitar na kylleng kylleng ki jaka jong ka ri India bad wat shabar ri ruh.
Na ka liang ki Pulit Manipur kila ïathuh ba ki la kem saw ngut ki briew kiba donkti ha kane ka jingjia khamtam eh ïa kito kiba don lang ha kane ka video kiba ïaid najan jong kine ki Kynthei.
Ki khubor kiba la ïoh kiïathuh ruh ba kaba la pynlong ïa ki jaidbynriew Meitei ban bat bad pynïaid lyngkhuid ïa kine ki kynthei arngut, kadei lyngba ka fake video ne ka video ba shu thok kaba la kynnoh ba ka don ka jingshah thombor jong ki shnong ba shong ki Meitei ha ki Kuki bad ha kane ka jingshah thombor ki kynthei Meitei kila shah batbor ha ki Kuki.