Shillong, Naitung 17 : Ki Pulit ka East Khasi Hills ha kine ki khyndiat sngi ki la pynlong ka jingkhynra kaba tyngeh ha kylleng ki bynta ka sorkar Shillong naduh kiba die kyiad beaiñ, kiba buaid ha ka por ba niah kali bad ter ter bad ki la kem ruh haduh 15 ngut ki briew kiba leh kam awria bad la pynngat ïa ki hapoh ka Immoral Trafficking Prevention Act.
U Superintendent of Police (SP) Bah Sylvester Nongtnger ha ka sngi Nyngkong ula ong ba ka jingïaid pahara da ka kjat ha ki thaiñ Khyndailad ban leh eiei pyrshah ïa ki nongdie met kiba ha kaba bun ki khep kam long tang ba ki die met sha ki briew hynrei ki wanrah ruh ïa kiba bun ki jingkulmar bad huri hura.
Halor kane, ki Pulit kila register case ïa kine ki briew hapoh ka Immoral Trafficking Prevention Act.
Une u Heh Pulit u pyntip ba ki la pynlong ruh ïa ka jingkhynra kyaid bad pynjur ïa ka jingiaid pahara ha kylleng ka Nongbah Shillong na ka bynta ka jingshngaiñ ki paidbah bad ban tehlakam ïa kino kino ki huri hura.
Ha kane ka jingkhynra, ki Pulit ki la ïoh ban kurup ïa palat 1,12,097 ml ka kyiad IMFL bad 7,74,000 ml ka kyiad pyrsi. ïa kane ka jingkhynra la pynlong ha ka thaiñ Motphran, Paltan Bazar, Mawblei, Nongrim Hills, Laitumkhrah Bazar, Mawlonghat, Urkaliar, Upper Shillong, Polo, Mawbah, Jhalupara bad Upper Mawprem da ka jingïarap lang ki Pulit Commando Kynthei ba la tip kum ki Meghashakti.
Ha kajuh ka por, ki Pulit ki la bat haduh 277 tylli ki kali bad ïoh daiñ kuna haduh T. 236500 na ka jingpynkheiñ ïa ki kyndon ain ha ka jingtalasi kali bad miet bad step da ka Shillong Traffic Police ha kylleng ki jaka. Kine ki briew ba ngat ha ka kuna ki dei kiba ñiah kali ha ka jingbuaid kyiad, niah thuk thuk khlem helmet, pynkylla ïa ki silenser, tah ïit ïong bad kiwei.
