Nongstoiñ, Jymmang, 25: Ka Hynñiewtrep Youths Council (HYC) West Khasi Hills District ha ka sngi saitjaiñ kaba dei 25 tarik Jymmang, lyngba ka Sier Lapalang Operation ka la leit ban khynra mynder ha ki katto katne ki bynta jong ka District.
Ka seng hapoh ka jingïalam u samla Lumlang Kharsyiemlieh President bad samla Olivertwist Marngar office secretary, Wandappynkmen Marweiñ Assistant Organising secretary, ka la hiar ban khynra mynder ha ka shnong Umjaru kaba ka don ka karkhana thymmai kaba la tip kum ka MD Ferro Alloy kaba ki nongtrei ki ong ka dei jong u bah Donboklang War na Shillong.
Haba ïakren bad u Manager Incharge u la ong la dep ïoh NOC naduh na ka shnong, ka Hima, ka KHADC bad na ka Meghalaya Pollution Control Board. Ka seng ha ka jingkhynra ka lap kumba 54 ngut ei ei ki bar jylla ki don ban trei. Napdeng kine bun ki la don ki Labour License.
Ka seng lyngba ka Sier Lapalang Operation ka kren shai ba ki bar jylla ki dei ban pynbiang ki kot ki sla, hynrei ki bym yn pynphai beit ïa ki bar jylla, namar ka sorkar lyngba ka Meghalaya Identification Registration Safety and Security of Migrant workers rules 2020 ka kren shai ba kam shah ban wan trei khlem kot sla.
Ka seng ka ïohi ba ka sorkar kan pyrkhing bha ïa ka rung ka mih na Bangladesh, namar ïoh lehse ka kin wan buhai shnong. Kumta hap peit pyrman bha khnang ban lait buh jingeh ïa ka jaitbynriew lada jia ba ki wan lyngba ka Ranikor sha Nongstoiñ ym lah ban tip.
Ka seng ka la hiar ha kiwei ki jaka ruh de bad ban peit pyrman ïa ki bar jylla bad ka kren shai ruh ban shaniah tang ïa ka adhaar bad sa ai noh labour licence ka long kaba ma ïa ka jaitbynriew. Namar kaba suk ban shna tuh ïa ka adhaar ha kane ka juk da ki bar jylla bad ka sorkar ka dei ban shimkhia ban lait na ki jingma khamtam ka Police Verification ka long kaba donkam eh.
Ha kajuh ka por ka seng ka pynbna ruh ba kan nang pynkhlaiñ shuh shuh ïa ka Sier Lapalang Operation nangne shakhmat ha West Khasi Hills, kum shi bynta ban dawa na ka sorkar ban pyntreikam noh ïa ka ILP.
