Khur takma rnong ki nongïalehkai karate ka Meghalaya na ka U-21/ Senior National Championship 2025

Shillong, Ïaiong 01 : Ka Jylla Meghalaya ka la ïoh ban khur haduh lai tylli ki takma rnong na ka lympung ïalehkai karate ïa kaba la tip kum ka Karate India Organisation U-21/Senior National Championship 2025 kaba long ha Gachibowli Indoor Stadium naduh ka 27tarik haduh ka 29tarik Lber, 2025.
Ki nongïalehkai kiba khur takma na kane ka lympung kaba long ha Hyderabad ki kynthup ïa ka samla Kynjailin L Mawnai kaba aireng ha ka thup kiba hapoh 21 snem bad 50 kilo.
Nangta ka samla Larisha Warbah kaba aireng ha ka thup Senior Women jong kiba 55 kilo.
Ïa ka takma rnong kaba lai pat la ïoh ban khur da ka kynhun ki samla shynrang ne ka Men Team Kata, kaba kynthup ïa u Gideon Tympuin, Ferdinand Samkupar Rani bad u Gregorwilson Makdoh.
Ïa kane ka kynhun la ïalam da u Bah Donboklang Lyngdoh kum u Coach bad u Bah Rodric Syiem kum u Manager.
Ha kane ka jingleit, ka All Meghalaya Karate-Do Association (AMKA) ka la phah haduh 15 ngut ki nongïalehkai ban shim bynta ha kane ka lympung.