Nongpoh, Risaw 04 : Ka long ka jingsarong kaba khraw ïa ka dong Ri Bhoi bad ka jylla Meghalaya baroh kawei hadien ba u Samla Daniel Damlong naka Ground and Pound MMA Gym, Ri-Bhoi u la ïoh ban khur ïa ka takma ksiar haka jingïakop National MMA Championship 2022 bala pynlong da ka All India Mixed Martial Arts Association kaba la sdang naduh ka 30 Nailur haduh 2 tarik Risaw ha Hyderabad, Telangana.
Ha katei ka lympung kumba 600 ngut ki samla ïalehkai MMA kila wan ban shim bynta bad 5 ngut naka jylla kila leit ban mihkhmat sha katei ka lympung hapoh ka jingïalam jong u Bah Cores Marweiñ kum u Coach, hynrei napdeng kitei kiba la leit ïa shimbynta sha katei ka lympung tang u Daniel Damlong u ba la ïoh ban khur takma ksiar haka kyrdan Light Heavy Weight Division hadien ba u la lah ban pynliem ïa u Vikas Yadav naka jylla Orissa.
Na ka liang u Bah Cores Marweiñ kum u Coach u la pynpaw ka jingsngewkmen kaba khraw halor ka jinglah jong u Samla Daniel ban khur ïa ka takma watla kiwei kiba la leit ban shim bynta lang kila pyrshang ban ïakhun tyngeh hynrei kim shym la poi sha ka thong, bad ai ruh ka jingkhublei ïa ki ba kin dang ïalehkai bad kilan met bha na ka bynta kiwei pat ki jingïakhun.
